願賭服輸(三)

我地每一年都有一個唔同既地支, 好似2008年係「戊子年」, 地支就係「子」, 生肖屬「鼠」；2009年係「己丑年」, 地支就係「丑」, 生肖屬「牛」, 如此類推……

而要知自己有冇「犯太歲」, 先搵出自己出生個年既干支, 再對照上表, 生肖屬「鼠」既大哥, 逢「子」年「犯太歲」；生肖屬「牛」既大哥, 逢「丑」年「犯太歲」；如此類推……

咁相同年支就叫「犯太歲」, 點解又有「沖太歲」同「刑太歲」？

「沖太歲」同「刑太歲」係同地支既六沖, 相刑有關:

子午相沖, 丑未相沖,

寅申相沖, 卯酉相沖,

辰戌相沖, 巳亥相沖。

寅、巳、申三刑,

丑、戌、未三刑,

子、卯、午三刑,

午刑午, 酉刑酉, 辰刑辰, 亥刑亥, 為之自刑。

而根據上面既資料, 就可以得出下面呢個「得罪太歲表」勒~~

除左地支六沖、相刑，重有地支相害、地支三合同三會, 好多報紙雜誌入面個d乜鬼野貴人生肖同害人精生肖多係依據上述地支關係而寫出黎, 大家可以拎張報紙出黎對下上面個表, 睇下佢話剋你個d生肖係咪同上表一樣?

而某大C亦向佢本運程書度預測今年屬「鼠」, 同隻「馬」相沖, 所以就話今年香港舉辦奧運馬術項目會有不順, 較多意外。而個位大C所根據既, 就係地支中既「子午相沖」原理勒~~

不過運動比賽, 唔多唔少都會有意外, 點先為之多呢? 點之為之順或唔順呢? 大C就好似冇明言……所以話, 有時做大C (佢自稱自己係玄學家), 預測準唔準唔緊要, 最緊要識點寫, 識點表達, 好似呢位大C咁預測, 真係立於不敗之地, 跟住之後又可以向自己本書度講自己點準點準~~

不過唔知大家有冇留意到, 如果盡量攞返各大C既預測同結果比較, 係唔係真係好似佢自己講到咁, 樣樣都 --- 中 中 中 呢? 當然, 自己出書, 梗係攞中個d出黎刊登啦, 唔中個d, 有鬼人記得咩? 怕且佢自己都唔記得囉~~

所以, 係咪真係好似大C咁講「犯太歲」一定黑仔？ 大家自己分析吧~~

……本來重想打, 不過有d攰, 下次有機會再同大家睇下太歲個真身係點~~多謝閱讀~~