破解軟皮蛇方法: 無

但係我依然想...

亂棍打佢, 睇吓佢既軟骨會唔會因為物極必反, 打得多變返硬

吊高佢喺棵樹度, 烈日下暴曬, 抽乾水分, 變蛇乾之後應該會硬d

叫隻恐龍去追佢, 刺激下會發泌激素, 肌肉會變硬 (<--我作既)

搵收數公司幫手, 呢單點都叫爛帳

拎佢去整炒蛇碌, 雖然我唔會食

呢一刻

最想最想最想做既只係

狂鬧蛇人士唔專業兼"冚"佢既電話再闖入佢大佬office問佢點教下屬, 如果可以乘機棍打蛇人士更好!!!

對話數則, 好無聊但又想記低~~

醫生: 呢個傷口好得咁快既?

我: 因為佢係兩星期前既捐傷

醫生(若有所思): 你有無買保險呀?

我: 有呀

醫生: 咁你一定係高危人士

我: 係呀 (心諗: 醫生果然知識廣博,agent話記者係高峰險職業<--雖然我唔駛去戰地)

醫生: 你個保險agent要幫你remark番你係容易發生意外既人

===================

爸: 男人呢, 最緊要有能力養妻活兒

我: 哦

爸: 女人呢, 搵個好老公養你就得架勒

我: 而家咩年代呀, 邊有咁多人結左婚就唔駛做?

爸: 咁佢地惟有認命, 鬼叫自己嫁唔到個好老公

======================

堂姐: 你知道邊個係xx未?

我: 未喎

堂姐: 但係佢知道你係邊個勒, 佢話喺你本雜誌見到你張相

(fine, 我只可以話reporter's pick一欄有如facebook或friendster, 新知舊雨pr小學同學都可以用唻得知我既近況.)

=====================

弟: 我d friend話你係我幾個家姐入面最靚同斯文嗰個

我: of course la

弟: 佢地未見過你喺屋企個真面目jar

我: 細佬, 係時候教你d野勒, 千祈唔好俾女人喺街既樣呃到, 其實佢地喺屋企係另一個人唻架, 你要面對現實

弟: 最超乎現實嗰個咪係你law

=======================

妹: 我d同學話羨慕你係我家姐呀

我: 係呀, hahaha

妹: 不過我話左你既真面俾佢地聽之後, 佢地話都係無福消受

(我既弟妹可唔可以幫我留番dd咁多多形象呢? 我以後點樣面對佢地既朋友同同學?)

========================

媽: 阿妹, 你究竟點行路?

我: 用腳行law

媽: 以後行路可唔可以集中精神少少, 唔好再魂遊?!

我: 試吓la

~~~~~~~~~~~~~~~

RE社長: 已經好小心, 但係都整親, 所以我決定認命, 認我係1個容易受傷既女人....

舊傷未癒

新傷又出現

明顯一次甘過一次

究竟我可唔可以安然過埋呢個月??

驚魂未定

回魂後, 尋求慰藉

被勒令備案, 睇醫生同食止痛藥

我最後悔既反而係無記低車牌號碼

夜媽媽無目擊者

但我會一直默念

肇事司機有報應!!!!!!!

對上一次踏足呢個地方係中學年代

當時無記啱啱播完吳啟華飾演馬友, 以南丫島做背景既電視劇

成班同學仔因為咁揀左去南丫島camp, 過左難忘既一夜

事隔多年, 再去南丫島

係因為我誤記當地有出名既芝麻糕 (實情係長洲至啱)

而朋友又想唻一個身心解放輕鬆hea遊

所以俾我呃左入去

朋友話呢"3枝香"係南丫島既地標, 但係孤陋寡聞如我, 竟然完全唔知道

我地第一個task係喺往尖沙咀既碼頭旁狂奔去入離島既碼頭, 全長應該有150m

做足warm up

一踩落南丫島, 已經感受到咩叫行人如鯽

即使佢變得愈唻愈遊客區

但作為一個無乜人食煙又無汽車既地方

呢度既空氣, 依然清新過人

扮遊客亂影相

亂影=無人睇得出你去左南丫島

食埋桂花chesscake

其實好似食緊一條蕉, 蕉味超重既banana chesscake都唔錯

臨走前

大力吸口清新空氣keep住喺丹田

直至下次郊遊

高唱在森林和原野是多麼的逍遙既時候, 先換氣南丫島既hea係傻豹會坐喺路邊曬太陽d貓又會好有性格咁攔喺路中間

嚴重車禍, 十幾人死亡,

第一次睇新聞會覺得心寒

訪問死者家屬, 一句: 無諗過訓醒一覺佢就死左

香港突然少左十幾個人, 變左天, 所有野都係一瞬間發生

電視影住路祭, 家屬喊到呼天搶地

隔離位嘈寶寶話慶幸自己仲活著

極之贊同

話說早幾日喺屋企樓下既馬路pk, 成個人趴咗落地

手損腳損流晒血

企返起身放空咁行返上屋企

處理完傷勢之後

開始覺得自己好好彩

平時極多車, 而d車又唔會收油既長命斜馬路

竟然喺我pk時一架車都無

如果咁啱跌低既時候, 有架車落唻

我100%肯定會因為司機收唔切油成為車下亡魂

因為咁而感恩

即使膝頭好似家暴案中被毒打既受害者

仍然覺得自己能夠活著係幸事

正常時間應該要25至30分鐘

首次經歷10分鐘既過程

除左好快之外仲好刺激

雖然份刺激可能唔係外來因素

只係一日飲左3杯咖啡

過多咖啡因o係體內流竄而出事

但係我從來無諗過10分鐘可以由柴灣出到旺角

司機叔叔沿路遇車過車, 片彎亦唔收油

仲有閒情同我講的士業隱憂

好想頒個一心n用獎俾佢

第一次自己搭泥鯭的

竟然係一個人坐晒成架車, 唔駛同人迫

我懷疑我會愛上呢種交通方式

把一切不如意歸咎於命運, 是我喜歡的說辭, 尢其是不好的事接二連三發生, 而我, 不過是旁觀者, 或不意出了一小分力的當事人, 最終, 竟成為最大的承擔者.

情況像你八八卦卦看人跳樓, 那人跳下來時壓爛了大廈某單位的冷氣機, 冷氣機主人要求賠償, 找的不是跳樓那位, 卻是圍觀的你. 因為跳樓那位已死了, 而你是現場惟一一位八卦人士, 再加上你拾起一塊冷氣機的碎片(?), 你可以怎做呢? 撒賴? 走數?

這譬喻很無稽嗎? 我遇上了更離奇更無稽的事

早陣子, 在某店借來名牌銀包拍照, 歸還時, 店員告訴公司的速遞再告訴我銀包上有原子筆跡, 於是我要巴巴地趕到那店領回銀包, 再自行想辦法清潔

問題來了, 若那原子筆跡是我弄上的, 當然是責無旁貸. 但, 當日我與銀包的相遇過程是: 從店內將它帶走, 放在我的桌子上, 而銀包一直有雪梨紙, 盒和紙袋三層保護. 第二天, 拍照, 從三層保護膜中取出, 5分鐘後放回保護罩內, 寫速遞紙, 貼上紙袋, 放到速遞房, 歸還. 全程沒有原子筆跟它近距離接觸而牽動出天雷地火

或許你會說, 是借前已有原子筆跡的冤魂在其上吧!

鑑於剛入行時曾因眼大睇過"龍"而出事, 硬食了死貓, 往後我都像驗屍般對待所有借貨物件(其實比驗屍還仔細, 他日, 繼庶務二課外, 我大可做QC). 所以, 銀包是光潔雪白的來到我的手上, 又白白淨淨的離我而去, 然後, 突然異變, 多了條原子筆痕, 難道是人類會無故長出的墨嗎?

除此以外, 我找不到其他解釋

我曾想過用白電油狂捽, 它是生是死與我無尤, 今天冷靜下來, 接受了銀包會有突變生墨的毛病, 我決定帶它到Jeeve's, 略盡綿力

但, 部冷氣機真的不是我壓壞, 我只是多手執起塊碎片, 想點呢?

放假4日, 留喺香港刺激經濟

元朗半日遊既翌日

有中上環半天團

本住地球係圓蕩失路都可以搵到出路既堅定信念

扮遊客亂咁行

完全唔知自己身在何處

無人無車空氣清新

只係覺得

呀...原來香港都咁靚, 吓, 呢度真係香港??

倉鼠仔有個頰囊

喺塊面兩邊

作用係貯存食物同運送整屋企既材料

未養兔仔前

我係倉鼠專家

每日睇佢地喺個籠度走唻走去

覺得佢地好傻

明明個兜有大量乾糧

但倉鼠仔依然會驚有人偷嘢食

將d糧塞晒落個頰囊度帶番屋企

再用木糖收埋

然後覺得自己好叻

識得積殼防饑

曾經一度以為倉鼠同牛一樣識得反芻

如果唔係點解可以吐番d瓜子出唻?!

頰囊既最大作用

應該係令到倉鼠望落去更加得意

可愛度提升60%

塊面漲卜卜, 好想篤佢幾下

如果一個人有頰囊, 我只會想將佢割落唻

當再次喺電腦見到塊包包面

好想問攝影師: 係咪嫌我唔夠可愛, 要幫我增加可愛度?

我唔駛積殼, 亦都唔需要防饑

頰囊對我唻講無咩用

可唔可以整走佢???

天朗氣清, 一齊去郊遊

搭船入無人小島

空氣清新林木成蔭水清見底好多魚

木板斷橋頹坘破屋野草

<--行呢段路簡直係一步一驚心

鋪張格仔布可以扮野餐

回程仲無聊到影合照

路上唱歌兒快快樂樂

玩得太盡興(?)

boots殘殘地變左做登山靴(!)

膊頭紅卜卜變燒豬(!!)

對腳攰至今朝仲未復原(!!!)

雙手依然軟弱無力(!!!!)

其實我地係<大逃殺>既生還者

鬥揹重嘢比賽我輸左俾pbotog

不過, 我相信o係"我係燒豬"既環節應該扳回一城

贏晒model同make up

我需要數星期去復原同埋培養下次郊遊既心理準備

感激一班肯同我癲既人^^

<--我喺度見到d好恐怖既野, 好彩, 咩事都無發生

<--其實我地真係去左郊遊

<--喺一片混亂之中(其實得我一個混亂)竟然無漏嘢, 可喜可賀

下次再玩過丫~~

唻自德國既廣告

繼兩日前既Chanel Mobile Art之後

又一次見到一d好想解剖佢個腦既人

到底呢班人既腦係咩構造

點解可以咁架?

好勁

"即使我死了, 也別麻煩其別人"<東京鐵塔>中, 老媽死左同個仔講既說話

8字頭既人係一個奇怪既分界線

我既上庄, 或者大我兩三年既人, 嗰班屬於7字尾既先生女士

永遠覺得8字頭既人嬌生慣養, 任性刁蠻

台灣叫我地呢批人做草莓族

唔跌得唔撞得唔失敗得, 要捧o係手好好照顧, 如果唔係隨時咇d汁出唻嚇親人

8字頭, 都會有異類

基因突變, 士多啤梨皮硬過鐵, 任跌任撞都唔會損傷

50粒入面應該有1粒

慶幸我層皮未至於硬過鐵

但總算緊記唔好太任性

麻煩親人就唔好la

係呀, 唔好麻煩人

特別係一d旁人無可能幫到你既事

所以我無基因突變

最多只係粒盡量唔麻煩人又唔搞到人既士多啤梨

7字頭既人睇8字頭既人唔順眼

其實, 8字頭既人又何嘗唔係睇細我地幾年既人唔順眼?!

緊急徵召

做我恨左好耐但大家都話我一定坐唔定既野

笑臉迎人聽聽話話乖乖巧巧呢d同平時無咩分別 (我自覺係咁)

執茶遞水做data entry沖下咖啡安撫他人

我又甘之如飴

企足成日10個鐘無得坐被問你唔攰既咩

我話平時返工都差唔多

今日腳攰平時手攰轉左少少咁law

事發前已聽聞有人好bitchy小心為上

今日唔知係咪某人攰得濟我覺得都唔算難應付

完畢o個刻竟然仲同我講好鐘意我 (因為我夠鬧不還口兼係庶務二課之光?!)

實情係我已經忙到就死, bitchy小姐不斷哦我, 而我仲笑住話唔好意思麻煩你等多陣 (可能佢以為我精神有問題, 於是驚話憎我會刺激我病發)

成日我講得最多既係

1. 好, 我明白

2. ok, 無問題

3. 知道, 我而家去做

4. 唔好意思, 我即刻去xxx

講以上說話依然笑面迎人

係呢排睇日劇睇得多既特訓成果 (其實都無咩關係)

有人脾氣暴躁有人踩場有人發癲有人搵人唻鬧有人因為攰心情唔好要人祭旗

我總算見識過又係受晒上述奇異事件既一位

反正我係稱職既打雜秘書 (仲係半義工究竟有無人知道!!)

一個人搬一箱60份重到對手會斷既brochuer, 落樓上樓再落樓

辛苦過做gym

終於被問: 究竟你平時係做咩架?

影相揹8對鞋12套衫再加飾物都係咁, 我受過長期訓練

 

題外話, 返到屋企先發現手臂同腳都有數撻瘀

究竟我今日係咪做苦力?

我相信庶務二課既大門已經為我打開

 

re Ada, 禮拜五晚同一位置我見到人扮魚, 唔知係咪同一個家族

銅鑼灣, 人來人往,

應該會發生唔同既故事

例如遇上他或者她

而我, o係18號遇到佢

朝頭早喺嘉蘭中心離開, 見到佢, 心情忐忑

最後係唔敢認識佢, 以為就咁錯失機會

後悔左一個下晝

哀歎點解自己唔大膽d或者勇敢d

4個鐘頭後, 估唔到

我再喺金百利對出既馬路同佢相遇

開心到

即刻拎大黑出唻影相<--不過隔左條馬路

係呀, 就係佢

你有無見過咁大條粟米?

朋友問做咩唔同佢合照呢

因為放大左既粟米粒粒, 其實有d嚇人

而我係比較膽小既人

而且有d事情, 都係睇唔清楚有d距離先係最靚

唔知繼粟米後, 仲會有咩食物呢?

青椒矮瓜金菇菜我都啱

好想組成一隊蔬菜軍團既相!!

我係睡寶寶

最高記錄係狂訓31個鐘

訓到同房以為我昏迷

不時走唻搖下我睇下我有無知覺 (仲探探鼻息)

當年...

每晚12點前我要訓覺, 否則會語無論次

唔訓足12個鐘, 我會呆呆濟

無得訓覺, 又會扭眼訓計

完全係小朋友既行徑

後來, 日訓7個鐘, 我已經感恩

再後來, 我發現2x歲前既自己應該係睡公主

狂訓狂訓狂訓

無王子深情一吻, 但時間到, 都要起身

睡公主變做灰姑娘 (仲係無人送我玻璃鞋添)

狂做狂做狂做

到今日...

我發現自己一直算錯左自己既前世

我既上一世

應該係一隻冬眠動物

而且影響過大

牽連埋今世

天氣一涷

要匿埋o係被竇

唔食唔郁訓十幾個鐘

每朝想起身, 對眼都黐實左

除左我係冬眠動物, 我諗唔到其他原因解釋呢個現象

除非有人o係我訓著時偷偷搽膠水黐住我對眼

所以...

我既前世同今生都係冬眠類動物

搵過晒所有圖鑑

最得意都係刺蝟

佢應該係我既前世

公司會唔會立例保護冬眠同事

例如天氣過冷就俾佢地訓覺唔駛返工

以免影響佢地既習慣??

 

觸發點係前前同事S遺留落唻既兩大箱XX (未執之前完全唔知佢地係咩)

第一步, 問嘈寶寶可唔可以幫手拎佢地出唻

兩人爬上同事E既桌, 離遠搬出兩個紙箱

嘈小姐忽發奇想...不如執埋呢度la (簡直係一時衝動)

第二步, 大掃除展開

第三步, fashion組既大掃除似乎波及埋遠方既其他同事

第四步, 公司大掃除正式開始

執執復執執

n年前既雜誌, props, 衫同鞋

以史前物件既封塵姿態出現

化身清潔姐姐既兩人愈執愈身痕 (真係成身痕, o個度應該有蚤)

好想搵番數位當事人番唻加入執公司大行動

而各人既一堆剩餘物資獲得散貨既命運

pr送既過年聖誕情人etc小禮物再加歷年既press release, 數量可觀......

有人提議去柴灣地鐵站擺檔 (就算$10件貨, 我地應該都可以過肥年, 好心動)

幾經艱辛, 終於執好兩個位

o個兩個由搬唻公司既第一日我就未見過地下同枱面既位

佢成為新景點

行過既攝影師, 記者, cs大叫, "嘩, 原來呢度係咁架" (究竟大家之前覺得佢係點呢? 一塊以衫同press release鋪成既地下?!)

想參觀既話記得趁早勒

因為根據婆婆C既收藏垃圾行為, 佢應該好快會回復原狀

Before的廢墟, 清潔姐姐甲後悔緊點解會提出執好呢個位, 至於after相, 請各位稍移玉步親身參觀, 覺得我地執得好既, 麻煩留番幾襾感嘆或讚美, 多謝

四點三, 天未光要起身

出發耕田去, 我係勤力既農夫

所以數十聲儲足勇氣就要掀開張被, 是日氣溫11度

而我既耕田裝束係1條飄逸浪漫半雪紡半紗不能擋風吊帶裙

it's miracle

著左毛毛褸著多件羽絨但係對腳依然涷冰冰

.

疾走7仔買野, 嬸嬸甲同嬸嬸乙問我今日咁涷買冰做乜野

因為我地其中一個環節係歡樂滿東華之腳趾雪~~o雪~~o雪

裙拉褲甩風雨中搵的士, 我開始明白民工既無奈

司機叔叔架車每到燈位都要死死火, 重新扭車匙再開車

已經遲緊到既小女子好驚地主會話永不錄用

又或者要中途落車行條長命斜去田度

天未光, 燈位前, 司機叔叔"tar"車中

.

終於到左地主屋企, 首要任務係破冰

先用鎚再用螺絲批然後用手, 十隻手指好似搽左胭脂咁紅噹噹, 好鬼靚

叮噹門鐘響, 新郎兄弟姊妹齊齊扮精神

miracle again

低溫下冰水中腳趾了乒乓波果真係歡樂滿東華 (途中有人話涷到腳趾抽筋, 善款數字立即急升)

.

12條雪條o係無遮無掩食風停車場落車再行老遠去新郎屋企

"我地既愛情無懼風雨"可以拍一個廣告

患難見真情, 好彩新娘預先派發溫派先生1個貼o係身

我愛你, 溫派先生, 因為我地已經有肌膚之親

而你努力發熱, 雖然受惠地方只係得我個肚

10點鐘, 麥記早餐送來溫暖一刻

又再鼓起勇氣奪門而出

.

混亂事件一浪接一浪

大雨大風低溫襲人, 香港公園根本影唔到相

數位農夫遵照兩位地主要求努力去撈魚, sorry, 係去約定影相地方撈番地主既親朋好友同事學生同學等等一干者眾

難度1, 無遮...難度2, 農夫們根本唔知道地主要搵既人係咩樣...難度3, 亦都唔知人數係多少

而作為女農夫既小女子只須陪伴新娘子側邊安慰佢開解佢即可

奈何, 我上唔到主車, 亦都上唔到另一架花車

因為車匙o係化身撈魚專家既農夫身上

於是同一時間, 我扮緊鳯仙雪條 (點解係鳳仙? 因為要配番我條裙隻色, 其實楊枝金露雪條都得既)

15分鐘後農夫們完成任務, 將各位先生女士安置上車出發去另一地點補影相

我不禁為各神勇農夫熱烈鼓掌, 勁~~

簡直係miracle x 3

.

食風文化中心安排眾人影相

充當執衫小姐歡樂小姐遮架小姐影相小姐一人身兼多職

當然仲有其他農夫們幫手

但大家既手都唔可以離開褸袋超過1分鐘

否則, 手指僵硬會襟唔到影相掣

於是上述工作係shift duty

有人要挑戰極限

最終係話手指無左知覺 (好慘但抵死)

惟有繼續安慰新娘, 你地既愛情可歌可泣天地動容, 於是橫風橫雨唻助慶

如果溫派先生係愛人, 羽絨小姐就係知己好友, 佢陪左我一日. 有農夫叫我除左件褸影相, 話咁樣會靚d, 但我呢一刻好理智咁話我要命唔要靚, 同時識穿農夫想用我件褸取暖

.

嘈寶寶, 我話以屎既狀態出席婚禮

果然如願以償

因為全場各雪條/ 農夫/ 漁夫/ 遮架根本無人有時間去整頭補妝

於是大家甩妝既甩妝, 頭髮散既頭髮散, 條眼得番一條線既扮自己係細眼人, hang緊機既扮自己冥想緊

何其有團隊性既一班人

.

有態度化妝師要求一絲不苟

轉妝轉頭所需時間令人焦躁

一行人企o係新娘房門口等佢等到發吽逗

每隔3分鐘各人輪流入房扮拎野

第5個人入去既時候, 化妝師終於決定求求其其算數

2分半鐘後搞掂個妝同頭 (同時覺得我地用開既make up果然係工廠出身, 快手快腳)

.

終於埋位食飯, 但一坐低就發現廿級眼訓

hang機然後熄機, 各人惟有繼續嘈嘈閉 (仲俾人問我係咪做開pr或者sales, 點解可以咁social, 因為我一停咀就會熄機law)

乳豬後蟹箝前延續今日玩左成日既低能無聊IQ題

諸如, 小明同隻馬賽跑, 點解小明會跑贏隻馬呢?

答案: 因為小明真係跑得好快

等等發人深省之問題, 令大家精神為之一振兼想打發問者

.

新娘換衫影相再換衫影相

咦...小姐先生弟弟, 你地好似每套衫都影過相勒bor??

係呀係呀, 台上兩位係景點, 俾左$800入場費, 更係影盡佢la

哦, 原來係咁, 但係我地準備既遊戲節目會受阻延玩唔到架

咁我俾左入場費而家點算先

okok你繼續影, 紙板新娘新郎唻個燦爛笑容唔准停唔該

.

執衫打點一切, 照鏡發現自己眼袋同眼一樣大, 眼圈同眼珠一樣色, 咀唇同塊面一樣白

我果然係屎既狀態

辛苦晒辛苦晒

我地今日係勤勞既農夫, 被呼喝既丫環奴僕, 擔擔抬抬既大力士, 控制人流既部隊, 仲有歡樂小姐同先生

原來呢個節目唔只去耕田, 根本係鐵人賽

訓兩個鐘, 踩21粒鐘

係最大既miracle

.

還望新郎新娘念在背後一班農夫辛辛苦苦

咁就百年好合永結同心當酬勞

某日, 老豆突然同我講秘密

佢話:你呢世人都好好運 (你又知, 你同我算過命?)

而我, 確實相信佢

於是走左去買六合彩 (頭奬有二千四百幾萬)

但係我無中到

我諗我既好運用晒係識好人身上

.

朋友兔照顧左我多年

除左我老豆媽咪屋企人之外

佢睇實我等我完全跳過反叛青春期

無穿無爛生生性性長大成人

.

中一o個年坐o係朋友兔隔離

英文老師要我地講自己既英文名

某同學話自己叫vampire(??)

吓但係我無英文名呢個名應該好重要

fiona, alice, cathy, amy, ann, susan定mary

諗唻諗去同我個人或性格都完全唔夾

不如叫bowie (因為我諗起林保怡)

o個刻識左3分鐘既朋友兔制止我再用極速送左個英文名俾我

呢個名沿用左多年印埋落身份證

(但查實我中一至中五除左老師根本無人叫我英文名)

又因為呢個名竟然同高材生做左朋友

.

朋友兔中一已經同我講佢想做xx

而我為左證明自己都好有大志

於是發下宏願要做老師

好彩我回頭是岸最終無荼毒小孩

但朋友兔確實成為我眼中好叻既xx

交既稅等於我n個月既薪金

.

考全班頭幾名同全班尾幾名既學生

o係老師眼中應該係好學生同壞學生既組合

但朋友兔同我講因為你早人地一年讀書所以腦部發育遲d

我竟然又信

自此心安理得接受自己成績差人一截既現實

一個人天真一定因為身邊有幫兇

我既幫兇係呢位話俾我聽彩虹下面有寶藏既朋友

話完俾我聽之後仲會走去埋寶藏等我更加堅信童話

.

14, 5歲最易變壞

但當你屋企同學校都有個阿媽看住你

根本無變壞既機會

我要多謝呢位學校既阿媽

.

但係脾氣爆燥即使有人睇住都改唔到

咁多年唻鬧過大大小小不下百次既交

朋友兔被我磨練到愈唻愈好脾氣

最後每次都係得我一個人發晦氣 (應該每個同我交往得耐既朋友都會被我訓練出好脾氣, 當1個人臭脾氣到極點, 你就會知道不宜硬碰硬, 惟有自己變得溫馴d, 修心養性)

一直奇怪鬧極都未絕交

又真係有人頂得順我既大脾氣

相信肥仔男友會好幸福, 因為老婆唔會同佢鬧交

佢應該要多謝我訓練左朋友兔n年

.

失戀苦戀喊完又喊

為愛情嘈嘈閉既人最乞人憎

好彩有人永遠俾我發癲o徒電話費唔會鬧我無聊

.

某段黑暗時期

日日怨天怨地睇野得番黑同白

自己都討厭自己既時候

慶幸有人拉我一把

陪我玩陪我癲就係等我復原

但明明自己功課考試多到癲

唔似得我呢d全校最hea學系最hea學生可以咩都唔理

清醒之後好擔心朋友兔因為我畢唔到業咁點算好

.

睇<追風箏的小孩>諗起朋友兔

為了你走千遍萬遍都可以

每次我闖完禍

朋友兔由得我嚎哭完

再陪我一齊搵解決方法

唔駛追風箏去證明

我都知後面一定有人撐住我

於是點樣跌點樣撞損手腳都唔驚

.

朋友兔話要同肥仔男友安定

我剩係識拎住個電話發出無意義既嘩嘩嘩

30秒後先記起要恭喜人

知你得閒無事會睇下呢個blog

所以點都一定要再講多聲

恭喜你

同埋辛苦你一直照顧我

細細個, 見到讀書叻既朋友仔帶眼鏡

覺得帶眼鏡=聰明=我帶眼鏡=成績會進步 (究竟係咩理論)

於是, 努力睇電視訓o係床睇書做盡一切傷眼行為

努力左5,6年之後

終於成功帶眼鏡 (無比毅力簡直要再三鼓掌)

劉華話老天愛笨小孩

所以笨小孩講既野都會成真

觀乎我童年既無限童真

都知我何其得老天寵愛

當病左咁多個禮拜再加面青口唇白

贏盡(??)所有近親遠方朋友pr陌生人既慰問時

我開始苦思

笨小孩係咪早排曾經某日試過童言無忌話想扮西施??

捧住個心皺埋道眉弱不禁風o個隻

我．．．有無曾幾何時飲大左話想做病人

應該無gra

口賤友人話: 你只會係1位成功既東施

ok, 咁你由得我做東施la

大大隻老虎打死幾隻身壯力健o個隻丫, 唔該

蘊釀一星期的喉嚨痛狂咳和流鼻水, 成功從輕微感冒, 進化成鼻竇炎

醫生說時還一副抵你死之貌, 我懷疑他心想: 這次開瀉藥給你, 你也要吃畢整個療程

擅自將1日4次的藥改為臨睡前吃, 是我的失職 (對勇戰感冒菌的失職)

但稍為放寬你的開藥限制, 便給我數顆安眠藥(!!)的醫生也難辭其咎

由踏入診所一刻都拿藥離開

我被醫生護士提著耳朵說了不下5次: 今次一定一定要跟足指示吃藥

好好好, 我是很乖的小朋友

4個小時吃3粒藥, 8個小時吃4粒藥, 臨睡前又吃顆安眠藥, 這樣的行為我會乖乖做妥

上網查看鼻竇炎的資料

我相信自己應撥歸為急性的一類, 即是吃了一個療程便會斷尾的幸福小孩 (別跟我說會翻發, 我會殺人)

醫生另一叮嚀: 吃完這個療程, 看情況如何, 再來見見我吧

醫生, 我四天見你兩次, 四百大元就此飛走了, 還要再見?

今天讀報, 我與他如斯頻密的互動, 會否令他誤會自己是屯門靚仔醫生?!

吃畢安眠藥, 早上醒來有如清晨五時半便要下田的農夫, 極艱巨

我要用1分鐘喚回四肢, 再用1分半鐘睜開雙眼

然後抱著很重很重的頭下床

改於臨睡前吃的安眠藥, 送我一個渾沌的早晨