外遊多日, 念念不忘想睇<SATC>

Champ Elysees見到有戲院上映此片

若非時間緊迫, 我會衝入去睇

好掛住Carrie, Charlotte, Samantha同Miranda!!

同事睇完o既評語好壞參半

但作為一個習慣將自己投射落電影角色既女人

我依然好想去睇o個個另一位自己既分身--Miranda, 又mean又想要人鐘意但唔討好既女人 (雖然我最想做既係Samantha)

某日打算上完堂去會一會呢4個女人

但最後一堂星期二課, 同學仔發起飲茶聯誼大行動

呢一刻先知同學仔個個都咁厲害, 而我似係天鵝堆中既醜小鴨, 或者係西施狗堆中既小豬(!!)

人人各有大志去上堂, 而我只係無聊打發時間 (或者係為左數星期後同學仔煮既一餐5 course dinner)

靚仔老師隨後趕到, 不斷質疑點解我會o係份卷上寫英文

懸案至今, 我都唔記得o個刻做咩寫得出hobby呢個字

與4個女人既約會順延再順延

最終我去左睇<文雀>都係未睇<SATC>

究竟...

睇場戲有幾難呢?

要認識一個人最好同佢旅行,

4日3夜或者6日5夜都無所謂,

o係o個幾日大家同食同玩同過,

最真同不堪既一面都會出晒唻, 避都無得避

剛完成8日既trip

返到香港, 已經被問你o地o個幾日發生左d咩事......

戴住眼鏡蓬頭垢面爛撻撻坐完十幾個鐘頭長途機, 連自己都會俾塊鏡既倒影嚇親, 但依然要同你同事共晋晚餐, o個一刻我懷疑一個搭完十幾個鐘機既女人可以俾d咩fantasy一個男人, 又或者只會令一個男人醒覺女人既真面目確係不可窺探既真理?

呢d發人深省既想法算唔算發生左d野?

又或者, 雖然好好彩無jet lag, 但係每到十點零十一點我就開始靈魂出竅痴痴呆呆

又算唔算有d野呢?

甚至係某日同事要去我問房拎野, 而我只有15秒時間將本來撻晒出唻既野塞返落篋. 而同事一見到我張床, 失聲問我: 呢隻究竟係咩? 點解佢o係度?? 我先記得有位Mr S o係房中又為時已晚

酒店既人仲好好心咁將Mr S放正o係床中間, 擔心佢怕悶而o係隔離放埋個電視遙涳 (我出房前Mr S明明o係床頭櫃度)

如果以上都唔算既話, 咁俾同事o係tapas店內發現我係一個懶到出汁既女人又係唔係發生左d野?

從來唔覺得因為唔想搣蝦殼蟹殼龍蝦殼而唔食佢地有咩問題, 因為我一早訓練左我細佬做搣殼機器, 反正無人幫手時我唔食亦無乜所謂, 但tapas店內同事得知呢件事時既眼神明顯話俾我知, 佢估唔到世界有我呢種人

哼, 唔食蝦, 我可以食佢, 一樣咁好味, 仲唔駛麻麻煩煩搣殼添

出trip幾日狂食狂食, 同呢班白鴿好似, 其實我地係咪近親呢?

Finally, I back to Hong Kong

所有o係我遠遊期間狂send短訊俾我既家人朋友, 擔心我會蕩失路又或者跌親撞親食唔飽訓唔好既人, 終於可以放心勒

總結, 最叫作發生左d野既係, 我首次o係Barcelona搭metro但扮到好熟手咁呃同事, 中途o係Saint站唔識買火車票而被識穿, 好彩最終安全到達機場, 呢樣應該係咁多日trip既大事件

近日既生活係

努力砌太空船

材料: 雪條棍, 橡筋, 白膠漿

兩點幾, 朋友問做咩仲未訓 (我係早睡早起既寶寶)

我: 砌緊太空船

查實隻船/ 太空船只係得個殼

但係我依然希望佢可以飛到去土星

雖然更接近事實既係佢只能夠飛到出我屋企個窗

然後o係窗台降落, 登陸

如果真係咁

我點算好呢?

而我d白膠漿已經黐住晒對手

想置身事外都唔得

但係....

我真係無可能用雪條棍扮太空船

如果得既話, 我會去美國太空總署

同埋申請雪條棍太空船既專利

可以是

皮膚。腸胃。鼻子。感情。行為。言語。文字

破解軟皮蛇方法: 無

但係我依然想...

亂棍打佢, 睇吓佢既軟骨會唔會因為物極必反, 打得多變返硬

吊高佢喺棵樹度, 烈日下暴曬, 抽乾水分, 變蛇乾之後應該會硬d

叫隻恐龍去追佢, 刺激下會發泌激素, 肌肉會變硬 (<--我作既)

搵收數公司幫手, 呢單點都叫爛帳

拎佢去整炒蛇碌, 雖然我唔會食

呢一刻

最想最想最想做既只係

狂鬧蛇人士唔專業兼"冚"佢既電話再闖入佢大佬office問佢點教下屬, 如果可以乘機棍打蛇人士更好!!!

對話數則, 好無聊但又想記低~~

醫生: 呢個傷口好得咁快既?

我: 因為佢係兩星期前既捐傷

醫生(若有所思): 你有無買保險呀?

我: 有呀

醫生: 咁你一定係高危人士

我: 係呀 (心諗: 醫生果然知識廣博,agent話記者係高峰險職業<--雖然我唔駛去戰地)

醫生: 你個保險agent要幫你remark番你係容易發生意外既人

===================

爸: 男人呢, 最緊要有能力養妻活兒

我: 哦

爸: 女人呢, 搵個好老公養你就得架勒

我: 而家咩年代呀, 邊有咁多人結左婚就唔駛做?

爸: 咁佢地惟有認命, 鬼叫自己嫁唔到個好老公

======================

堂姐: 你知道邊個係xx未?

我: 未喎

堂姐: 但係佢知道你係邊個勒, 佢話喺你本雜誌見到你張相

(fine, 我只可以話reporter's pick一欄有如facebook或friendster, 新知舊雨pr小學同學都可以用唻得知我既近況.)

=====================

弟: 我d friend話你係我幾個家姐入面最靚同斯文嗰個

我: of course la

弟: 佢地未見過你喺屋企個真面目jar

我: 細佬, 係時候教你d野勒, 千祈唔好俾女人喺街既樣呃到, 其實佢地喺屋企係另一個人唻架, 你要面對現實

弟: 最超乎現實嗰個咪係你law

=======================

妹: 我d同學話羨慕你係我家姐呀

我: 係呀, hahaha

妹: 不過我話左你既真面俾佢地聽之後, 佢地話都係無福消受

(我既弟妹可唔可以幫我留番dd咁多多形象呢? 我以後點樣面對佢地既朋友同同學?)

========================

媽: 阿妹, 你究竟點行路?

我: 用腳行law

媽: 以後行路可唔可以集中精神少少, 唔好再魂遊?!

我: 試吓la

~~~~~~~~~~~~~~~

RE社長: 已經好小心, 但係都整親, 所以我決定認命, 認我係1個容易受傷既女人....

舊傷未癒

新傷又出現

明顯一次甘過一次

究竟我可唔可以安然過埋呢個月??

驚魂未定

回魂後, 尋求慰藉

被勒令備案, 睇醫生同食止痛藥

我最後悔既反而係無記低車牌號碼

夜媽媽無目擊者

但我會一直默念

肇事司機有報應!!!!!!!

對上一次踏足呢個地方係中學年代

當時無記啱啱播完吳啟華飾演馬友, 以南丫島做背景既電視劇

成班同學仔因為咁揀左去南丫島camp, 過左難忘既一夜

事隔多年, 再去南丫島

係因為我誤記當地有出名既芝麻糕 (實情係長洲至啱)

而朋友又想唻一個身心解放輕鬆hea遊

所以俾我呃左入去

朋友話呢"3枝香"係南丫島既地標, 但係孤陋寡聞如我, 竟然完全唔知道

我地第一個task係喺往尖沙咀既碼頭旁狂奔去入離島既碼頭, 全長應該有150m

做足warm up

一踩落南丫島, 已經感受到咩叫行人如鯽

即使佢變得愈唻愈遊客區

但作為一個無乜人食煙又無汽車既地方

呢度既空氣, 依然清新過人

扮遊客亂影相

亂影=無人睇得出你去左南丫島

食埋桂花chesscake

其實好似食緊一條蕉, 蕉味超重既banana chesscake都唔錯

臨走前

大力吸口清新空氣keep住喺丹田

直至下次郊遊

高唱在森林和原野是多麼的逍遙既時候, 先換氣南丫島既hea係傻豹會坐喺路邊曬太陽d貓又會好有性格咁攔喺路中間

嚴重車禍, 十幾人死亡,

第一次睇新聞會覺得心寒

訪問死者家屬, 一句: 無諗過訓醒一覺佢就死左

香港突然少左十幾個人, 變左天, 所有野都係一瞬間發生

電視影住路祭, 家屬喊到呼天搶地

隔離位嘈寶寶話慶幸自己仲活著

極之贊同

話說早幾日喺屋企樓下既馬路pk, 成個人趴咗落地

手損腳損流晒血

企返起身放空咁行返上屋企

處理完傷勢之後

開始覺得自己好好彩

平時極多車, 而d車又唔會收油既長命斜馬路

竟然喺我pk時一架車都無

如果咁啱跌低既時候, 有架車落唻

我100%肯定會因為司機收唔切油成為車下亡魂

因為咁而感恩

即使膝頭好似家暴案中被毒打既受害者

仍然覺得自己能夠活著係幸事

五日內睇三齣戲, 由血肉橫飛打不死到感人肺腑真人真事至犧牲小我好爸爸

咁既戰績, 唔怪得會俾不同既人問: 你係咪好鐘意睇戲?

蘭保式既手腳分離同射甩個頭, 其實真係不太恐怖

埋身肉搏白刀入紅刀出, 或者一手扯爛敵人既喉嚨, low tech打鬥更加符合官能刺激

講劇情, <熱血回歸>真係無乜, 演技? 亦都唔會有

點會expect打左botox既史泰龍俾到表情你呀?

但係佢以六十高齡有咁既肌肉仲可以通山跑兼碌唻碌去, 果然老當益壯

最痛快係睇蘭保殺人, 我承認我有潛藏既血腥因子

見到佢將壞人殺殺殺同扭斷頸確係大快人心

好似將自己既冤氣都發洩晒咁

同玩過山車或者跳樓機狂嗌既行為, 有異曲同功之效

----------

<戰火逃城>掛發哥頭賣Hogg肉

二次大戰, 英國記者帶住一班孤兒攀山涉水搵安全地

最後死於破傷風

結局有d爛同兒戲

但因為發現佢係真人真事改篇, 即刻覺得呢個結局好慘情

Hogg變得好偉大之餘仲靚仔左

然後小朋友既演技又好左, 故仔結構又緊湊左

於是大家都發現我既評分準則好唔可信

不過, 呢個世界的確有好人

點都可以為呢齣戲加多20分

------

<一個好爸爸>應該算係張艾嘉拍既喜劇

結局無預料中咁悲慘已經係喜劇

奶茶依然係我最喜愛女演員既榜首

黑社會爸爸既掙扎會唔會係所有做老豆既哀歌?

個女細細個勁黐你, 到大過左就同你無乜兩句, 爸爸會唔會好唔開心

話時話我都好耐無同老豆傾計添

經上次<mist>一役, 今次朋友仔全程唔敢出聲

到散場, 好開心咁話: 終於解禁

然後blahblahblah狂講野

唔...辛苦佢勒, 捱左咁耐唔出聲

正常時間應該要25至30分鐘

首次經歷10分鐘既過程

除左好快之外仲好刺激

雖然份刺激可能唔係外來因素

只係一日飲左3杯咖啡

過多咖啡因o係體內流竄而出事

但係我從來無諗過10分鐘可以由柴灣出到旺角

司機叔叔沿路遇車過車, 片彎亦唔收油

仲有閒情同我講的士業隱憂

好想頒個一心n用獎俾佢

第一次自己搭泥鯭的

竟然係一個人坐晒成架車, 唔駛同人迫

我懷疑我會愛上呢種交通方式

完全唔知齣戲講乜既情況下入場, 自然唔會做定功課, 亦都無諗過睇戲前要預習, 於是兩粒幾鐘, 其實我睇到有d一頭霧水

後來先知, 哦~~卜戴倫即係Bob Dylan, 原來係講個歌手, <Blowin' in the wind>都係佢既<--我的確好無知, 後來既發展更加嚇人!!

六個人分別代表唔同時期既Bob Dylan, 傳奇既一生由民歌歌手到electric song然後唱福音

六個角色無一個叫Bob Dylan

幾個故仔跳唻跳去, 黑白穿插彩色, 一度嘗試將佢地link埋一齊, 無幾耐就放棄, 因為幾個故仔人物其實都無關連, 而且我開始病發(註1)

Cate Blanchett女扮男裝o既造型最神似, 嗰種睥睨同扮相, 簡直係Dylan上身

黑人細路Marcus Carl Franklin, 11歲人仔竟然演出蒼桑, 一句"活喺你既年代"令人心痛

反正六個人演既Dylan, 都有種被誤解既情況

事前唔知Bob Dylan既生平, 睇完齣戲亦唔見得理解多左, 與其話佢係齣人物生平簡介, 不如話將Dylan嗰種"吓, 乜你覺得係咩? 我有咁講過咩? 我係咁既意思?"既被曲解擴充再擴充

然後成就一齣戲

電影叫<I'm not there>, 我懷疑導演根本就唔想將卜戴倫個名掛喺嘴邊, 你地自己感受就得

中文譯名將主謂賓大兜亂, public icon個名大大隻寫出唻, 無晒幻想空間, 咁算唔算敗筆?

註1) 對於一個有認人障礙既人而言, 睇呢齣戲有廿個辛苦, 事關除左Cate Blanchett同Marcus Carl Franklin之外, 我根本分唔到其他人 (分到佢地因為一個最瘦一個最黑). 即係Christian Bale, Richard Gere, Heath Ledger同Ben Whishaw, 旁人明顯分得出既四個人, 我將佢地當係一個人咁睇, 係呀, 我連滿面鬚既Richard Gere都當左Heath Ledger, 仲以為係後者既老妝

所以散場時, 朋友甲乙係咁數究竟嗰七個人係邊七個時, 我一句野都無講, 因為我根本只係數到三個....其實係兩個, 因為我更多時候係將Cate Blanchett撈埋落嗰四個人度

睇到依嘩鬼叫拍晒手掌既電影

將男人最驚既閹割心理無限放大

黑色幽默由棚牙開始

男性主義鐘意用佔有女人既身體作領土擁有權既方法

跨下等同力量

你睇林子祥喺<女人本色>度點對梁詠琪就知

愈自豪既地方, 其實可能最脆弱

針對呢點

女人要發洩, 惟有投射去神話故仔度

話俾你聽小心d唔好亂唻我都有武器

呢齣戲, 其實最啱男朋友/ 老公鐘意滾三滾四既女人

帶埋佢既另一半同睇

應該甚有警惕作用

留守至字幕完

一句"no man was harmed in the making of this film"

應該可以今一眾男士定定驚

稍減齣戲既恐怖程度

雖然我覺得佢似笑片

特別係結尾阿Dawn既奸笑

簡直大快人心

電影製作認真到喺齣戲既官方網 危險, 勿近

有女主角阿Dawn既blog

講擁有vagina dentata既諗法

逼真到有晒個人資料同my favourite music

做戲做足全套

把一切不如意歸咎於命運, 是我喜歡的說辭, 尢其是不好的事接二連三發生, 而我, 不過是旁觀者, 或不意出了一小分力的當事人, 最終, 竟成為最大的承擔者.

情況像你八八卦卦看人跳樓, 那人跳下來時壓爛了大廈某單位的冷氣機, 冷氣機主人要求賠償, 找的不是跳樓那位, 卻是圍觀的你. 因為跳樓那位已死了, 而你是現場惟一一位八卦人士, 再加上你拾起一塊冷氣機的碎片(?), 你可以怎做呢? 撒賴? 走數?

這譬喻很無稽嗎? 我遇上了更離奇更無稽的事

早陣子, 在某店借來名牌銀包拍照, 歸還時, 店員告訴公司的速遞再告訴我銀包上有原子筆跡, 於是我要巴巴地趕到那店領回銀包, 再自行想辦法清潔

問題來了, 若那原子筆跡是我弄上的, 當然是責無旁貸. 但, 當日我與銀包的相遇過程是: 從店內將它帶走, 放在我的桌子上, 而銀包一直有雪梨紙, 盒和紙袋三層保護. 第二天, 拍照, 從三層保護膜中取出, 5分鐘後放回保護罩內, 寫速遞紙, 貼上紙袋, 放到速遞房, 歸還. 全程沒有原子筆跟它近距離接觸而牽動出天雷地火

或許你會說, 是借前已有原子筆跡的冤魂在其上吧!

鑑於剛入行時曾因眼大睇過"龍"而出事, 硬食了死貓, 往後我都像驗屍般對待所有借貨物件(其實比驗屍還仔細, 他日, 繼庶務二課外, 我大可做QC). 所以, 銀包是光潔雪白的來到我的手上, 又白白淨淨的離我而去, 然後, 突然異變, 多了條原子筆痕, 難道是人類會無故長出的墨嗎?

除此以外, 我找不到其他解釋

我曾想過用白電油狂捽, 它是生是死與我無尤, 今天冷靜下來, 接受了銀包會有突變生墨的毛病, 我決定帶它到Jeeve's, 略盡綿力

但, 部冷氣機真的不是我壓壞, 我只是多手執起塊碎片, 想點呢?

放假4日, 留喺香港刺激經濟

元朗半日遊既翌日

有中上環半天團

本住地球係圓蕩失路都可以搵到出路既堅定信念

扮遊客亂咁行

完全唔知自己身在何處

無人無車空氣清新

只係覺得

呀...原來香港都咁靚, 吓, 呢度真係香港??

倉鼠仔有個頰囊

喺塊面兩邊

作用係貯存食物同運送整屋企既材料

未養兔仔前

我係倉鼠專家

每日睇佢地喺個籠度走唻走去

覺得佢地好傻

明明個兜有大量乾糧

但倉鼠仔依然會驚有人偷嘢食

將d糧塞晒落個頰囊度帶番屋企

再用木糖收埋

然後覺得自己好叻

識得積殼防饑

曾經一度以為倉鼠同牛一樣識得反芻

如果唔係點解可以吐番d瓜子出唻?!

頰囊既最大作用

應該係令到倉鼠望落去更加得意

可愛度提升60%

塊面漲卜卜, 好想篤佢幾下

如果一個人有頰囊, 我只會想將佢割落唻

當再次喺電腦見到塊包包面

好想問攝影師: 係咪嫌我唔夠可愛, 要幫我增加可愛度?

我唔駛積殼, 亦都唔需要防饑

頰囊對我唻講無咩用

可唔可以整走佢???

天朗氣清, 一齊去郊遊

搭船入無人小島

空氣清新林木成蔭水清見底好多魚

木板斷橋頹坘破屋野草

<--行呢段路簡直係一步一驚心

鋪張格仔布可以扮野餐

回程仲無聊到影合照

路上唱歌兒快快樂樂

玩得太盡興(?)

boots殘殘地變左做登山靴(!)

膊頭紅卜卜變燒豬(!!)

對腳攰至今朝仲未復原(!!!)

雙手依然軟弱無力(!!!!)

其實我地係<大逃殺>既生還者

鬥揹重嘢比賽我輸左俾pbotog

不過, 我相信o係"我係燒豬"既環節應該扳回一城

贏晒model同make up

我需要數星期去復原同埋培養下次郊遊既心理準備

感激一班肯同我癲既人^^

<--我喺度見到d好恐怖既野, 好彩, 咩事都無發生

<--其實我地真係去左郊遊

<--喺一片混亂之中(其實得我一個混亂)竟然無漏嘢, 可喜可賀

下次再玩過丫~~

於世貿既Starbuck's等店主歸來

邊飲經典朱古力邊發呆

左手邊

就係呢個展覽

我無睇過<13點>既漫畫

但係呢一刻

我覺得佢係香港版Blythe

唻自德國既廣告

繼兩日前既Chanel Mobile Art之後

又一次見到一d好想解剖佢個腦既人

到底呢班人既腦係咩構造

點解可以咁架?

好勁

Chanel 2.55

一個成日介紹但從來無諗過會買既袋

情況等同見到Hermes

我會尖叫嘩好靚呀d皮好軟呀隻色好搶呀blablabla

但依然唔會將佢set做我既gift list

Chanel Mobile Art, 入場, 因為豬皮手袋

近距離見到更覺震撼

一個有豬毛有紋身既Chanel袋

導覽聲(?)話鱷魚皮, 蜥蝪皮, 鴕鳥皮手袋索價高昂

咁一隻有紋身既豬皮袋呢?

俾你, 你要唔要?

荒木經惟既裸女照搭花花圖畫

鎖鏈纏身既裸女有種SM feel

驟眼睇背後影子竟然似一朵花

鐘意影裸女影色情既荒木經惟果然無令人失望

紙皮盒動畫既手袋起義

令人會心微笑

同場有位外籍人士大大聲狂笑都係因為呢六個箱

小野洋子既願望樹已經插針都唔入

不過我依然搵到位放低我既願望

Pierre & Gilles 要你從水既倒影窺日與夜

於是個個低頭凝視

貨櫃內有chanel logo有bear bear有皮味

電視播住女人喺呢度活動既家居照

35分鐘既exhibition

發現另一個角度睇既2.55, 原來唔只係個手袋

只係覺得有d唔夠喉

痛恨點解自己對眼唔係快門

影唔低見到既野

3個鐘頭後

我記得既只得番8成