7月開始等<哈利波特7>既中文版

3個月來要避開所有關於呢本書既評論同揭秘

好辛苦

最怕係睇完英文版既朋友仔會突然鬼上身爆個結局俾我聽

每次聽到Haryy Porter會點點點

都不期然即刻搵地方匿

9月尾訂左本書, 開始每日倒數

30, 29, 15, 13, 8, 7....

甚至早左一日去拎書

仲俾老板問你係咪好心急?

係呀係呀我真係好心急

20同21號既活動係睇書

讀後感係好．好．睇

(如果呢篇真係讀書報告我一定拎丁)

兩本書一屋三姊弟輪流傳

細佬仲同上集搏鬥緊, 我同妹妹唔敢o係佢面前討論劇情, 怕俾佢怒啤

睇完

最震驚既唔係個結局

而係尋日睇報紙

J.K.羅琳話鄧不利多係同性戀!!!!

吓~~~~

我對各人既性取向無特別意見

但係呢本書唔係寫俾小朋友睇既咩, 咁既人物設定會唔會俾學校投訴??

<哈利波特>大結局, 朋友叫我轉睇向達倫

但係佢有咁多集, 我屋企已經無位放書勒, 點算好?

從柴灣塔的士至又一城, 塞車塞到司機"jeep jeep jeep"

我在後座唱"在森林和原野是多麼的消遙...."

唱了半個鐘後

見到朋友的準老公和準姊妹

點解我又係分派到著衫呢個環節既

我想出去同兄弟玩喎 (雖然朋友話d兄弟好岩"chum")

下次塞車, 我會唱呢首歌

Flash: mtr song

某年某月開始發現身邊有怪獸

心諗只要自己仲係人就得啦

唔理唔理唔理

但係怪獸數目愈唻愈多

先發現人人個心都住左隻怪獸

平時唔覺唔覺

忽然怪獸會反噬你

變得面目猙獰生人勿近

係咪好恐怖呢

最恐怖係你對住塊鏡都係見到個人樣

又點會估到自己已經受感染

好似人狼同疆屍咁

慢慢就會出現異變 (仲會搵其他人咬)

諗落又有d似喪屍

我好想睇生化危機3

沙漠有喪屍喎

駱駝會唔會係喪駱駝

咁仙人掌同老鼠仔呢

佢地會唔會變喪屍

扯遠左添

最慘係你無照妖鏡

照唔到人又照唔到自己係咪隻怪獸

咁點算好呢

於是繼續相信自己係好地地既一個人

終於某日

有人話你知

喂其實你受感染

係隻乞人憎大怪獸

尋晚發夢我變左做毛毛咁既樣

但係d毛毛係桃紅色再戴住頂粉紅色pompom冷帽

頂冷帽係我尋日襯衫時既用具

我諗我真係好想買頂帽

桃紅色毛毛周圍捉人咬(我死性不改, 變左怪獸更加周圍咬人)

俾我咬完既野都會變桃紅色 (好彩唔係shocking pink, 我驚太搶眼我會眼花)

醒左即刻望下自己雙手係咪桃紅色

如果, 有日我真係俾怪獸反噬

麻煩你話俾我聽

大大聲同我講你咁做好乞人憎, 麻煩晒

朋友曾說工作得累了想咆吼想隨街捉人咬, 那就在心裡默念: 我愛我的工作

然後你就會覺得世界美好空氣清新所有事情迎刃而解

我從海港城默念我愛我的工作, 我熱愛我的工作, 我好愛我的工作......

重覆無數次至加連威老道再走到利時

默念默念默念默念

精誠所致金石為開

但是, 我依然想捉人咬

原來,

這是騙小孩子的說話

情況等同爸爸媽媽呃你說: 只要乖乖的, 聖誕老人就會送你禮物一樣

凡夫俗子如我初嘗自我催眠失敗了

便在個半小時後闖入Mrs. Frields買肥死人Brownie

再在半個小時後衝入Starbuck's, 點了杯加勁多cream的朱古力

然後在車上, 一啖朱古力一口Brownie

甜死人又肥死人, 而且好滿足

覺得自己又是一條好漢的同時

我不再懷疑: 點解我唔會愈忙愈瘦

只希望不會愈忙愈肥就足夠

我其實好鐘意一個人去行街食飯睇戲浦書店發呆周圍逛無所事事

晨咁早上完堂已有計劃既大綱--是日宜睇戲(明明尋晚同朋友講我好病好唔舒服唔想返學, 但今日好番少少就走去周圍玩)

想睇<色戒>, 但個個睇完都話太沉重

我需要開心振奮一下等我可以繼續抗戰

<Nanny's Diaries>會唔會更啱我?

買飛期間心大心細反正睇完<Nanny's Diaries>應該會心情大好再睇沉鬱電影剛好平衡

時間又配合得咁好無理由放過

王力宏同梁朝偉都呼喚緊我唔應該拒絕

最終決定11點50係<Nanny's Diaries>再唻3點既<色戒>

中間剛好有1個鐘頭既lunch time食個Delifrance

一個人睇戲既好處係即使全院爆晒你都一定會有最佳位置

皆因全院滿座睇<色戒>我仍然可以o係高層中間位安坐兩個小時四十五分

如果坐前排我驚我會頭岳岳最終頸緊晒

<Nanny's Diaries>幾好睇係輕鬆小品, 哈哈哈個幾鐘又有d腰心位

我媽媽一手一腳湊大我地四姊弟我唔知由工人湊會係點既樣

亦唔太接受到有人生左個仔出唻只係為左維繫兩夫婦既感情

我想話o個個係人仔唔係公仔佢既人生唔應該由你控制

不過我確實識小朋友將屋企既賓賓嗌做媽咪

親生媽媽佢以為係aunty, 至於爸爸佢叫做uncle

諗番都幾悲哀

媽媽爸爸竟然仲夠膽遷怒工人覺得佢教壞細路

究竟天理何在

套戲其實似乎係原著個人物背景可以接受d

電影話Annie要研究人類學所以深入虎穴未免太牽強

不過我仲未睇完本書已經睇左套戲知道結局感覺好怪異

再入場睇<色戒>心理準備ok

兩個幾鐘竟然唔覺悶我覺得已經係加分位

話說上次我睇<斷背山>好想走好想走係咁俾朋友話我坐唔定

想睇歷史故事我會勸你睇<太陽照常升起>

張愛玲只會寫女人仔既故事同心情

王佳芝同易先生都係咁既結構

易先生似胡蘭成咩?我覺得胡蘭成對張愛玲好d好似無咁變態咁控制欲

三點盡露連場激戰又唔覺太震撼

反正睇西片類似片段都層出不窮只係今次主角換左做亞洲人

影評太多人講無謂班門弄斧

不過o個隻鴿子蛋真係睇到我眼都凸, 嘩嘩嘩嘩嘩

心裡吶喊幾十聲全場仲有此起彼落既讚嘆聲

睇完戲仲有時間由旺角行去尖沙咀剪頭髮再行番旺角搭車返屋企

婉拒朋友雀局既邀請

喂我禮拜六日個樣從來不宜見人

打扮求其頭髮就咁紮起唔化妝唔理身世

只會嚇親人

中環站趕緊去twist影相

眼尾睄到迎面女子有d古怪

由頭scan到落腳

點解佢會無著鞋

光脫脫一對腳行行行

隔離位男友又好似無事發生咁拖住佢言談甚歡

忍唔住回頭再望清楚究竟我有無睇錯

確實係無著鞋o係中環地鐵站行緊bor

難道係國王的新衣現代版

抑或佢對鞋太刮腳忍受唔住要除鞋

定係佢過馬路時甩左鞋

還是佢係山區既野孩子慣左唔著鞋

好想好想問佢知唔知自己無著鞋點解唔著鞋

但好怕俾人打死出唔到中環呢個地鐵站

由畢打街行上雲咸街再到威靈頓街

沿途都諗住呢個問題

會唔會係我食藥除左手震發呆仲會眼花睇錯野?

為左排解婚前抑鬱症

禮拜六, 晨咁早起身上堂

興興奮奮口齒不清講:香港的交通很方便

再去書局捧走3本新書

兼預訂埋<哈利波特7>

整指甲期間發吓呆同ex PR傾下計, 咁又過左兩個鐘

中環街頭苦思食至愛蘭芳園好定漢堡飽

最終, Burger Joint勝出

半溶車打芝士配lemon mustard再加本王文華做調味, 呢個係我既午餐+tea

扮悠閒搭叮叮落銅鑼灣借飾物, 同老板娘傾下計

再好忙好忙趕去拎鞋拎晚裝

旺角尖沙咀走走走, 好彩爸爸提供私家車加司機管接送

夜晚做陪客招呼山長水遠出席飲宴既親戚, 再衝返屋企執房(無錯, 我間房仲係一個垃圾池咁既樣)

途中又要黏下對聯喜字幫手拜下神

家姐上頭, 我地坐隔離嘻嘻笑

新娘子聲稱自己點幾入房訓, 輾轉反側兩點幾都未訓著

小婢就o係度同佢聽日既裝備努力苦戰

邊個話結婚係兩個人既事?

麻煩搵人拖佢出去打五十大板再問佢結過婚未

當然, 我都未結過

但係我已經患左婚前抑鬱症

近兩個月, 我個電話變左做wedding service hotline

要負責既包括: 老豆想俾帖阿邊個我要幫手搞掂; 親戚甲想買衫會問去邊度買好; 細妹未買鞋仲想買多條裙我更要盡力做到最好; 細佬堂弟要買西裝我需要去搜刮; 親戚乙買左衫同褲問襯咩飾物好; 親戚丙解釋佢件衫係咩款式顏色想知買pedder red定le saunda對鞋好; 當事人甲同乙要求人手上佢屋企幫手pack回禮禮物, 我變身做工廠女工; 結婚位皇太后發現有阻滯service hotline更要罵不還口(我自首, 其實我係有還口)

究竟我係德成僱傭定stylist還是wedding planner?

終於....我自己既野拖到最尾一刻先搞掂(其實我仲未買齊野)

而且, 我仲患上婚前抑鬱症, 情緒低落心情暴躁好想搵人咬

呢一刻, 我衷心希望

快d過左禮拜日啦

我會開始做心理準備, 兩日後, 我會係一隻披住狼皮既綿羊,

或者係披住兔皮既烏龜, 慢到唔識俾反應,

安安全全過左o個日去

然後, 婚前抑鬱症可以不藥而癒, 阿門

一道有缺口的牆把魔幻與現實兩個世界阻隔開來, 之前看trailer, 還以為是<森魔>一類的懸疑電影, 結果是得到喜出望外的個多小時
Claire Danes扮星星, 愈開心便愈發光; Charlie Cox飾癡心少年, 為搏紅顏一笑跳進異世界
故事像你我童年時常聽的童話故事, 穿插黑心壞人與巫婆
CG畫面將多年前只能靠幻想出現的魔法場面呈現
不是那種老土的愛與勇氣大冒險
一開始, 根本就是自私的以物換愛情的故事(我聯想到用LV換愛情的港女)
還有人因此come out of the closet, 全場大拍手掌
童話故事應該不會有這幕吧
happy ending當然是童話的必然結局
即使坐在JP最邊邊的位置, 還是看得高興, 不時放聲大笑
絕對有4個半好睇

我會記得幻想與現實有分野
強行將任何一方帶往另一面, 它只會變成石頭或stardust
物質沒變, 但感覺不同, 還是別強求

完場, 編輯K說: 如果<出埃及記>有CG幫手, 應該不會死得這樣慘!
也對, 或許是劉心悠殺完人後, 那批公仔會跳舞; 邵美琪的手指發出綠光, 任達華一命嗚呼; 又或者是, 當溫碧霞真情剖白時, 四周出現濃霧, 以表達她內心的迷茫與自憐
然後, 大家會拍爛手掌說: 好一齣後現代電影!

近幾個月病既次數太頻密, 次序都係咁: 喉嚨痛兩日-->狂咳-->流鼻水-->發燒-->呆呆滯滯-->面青口唇白-->睇醫生-->食一日藥-->好番
到底係人大左所以抵抗力愈唻愈差, 定係我既生活愈唻愈唔健康呢?
近日o係公司見到有人咳或者話喉嚨痛,
我都懷疑自己就係傳染佢地既原兇
怪唔之得化妝師L見到我要彈開九丈遠la

睇醫生小插曲,
醫生: d擴張氣管藥食完會手震同心跳, 有無問題?
我: 唔食得唔得
醫生: 咁你自己啪開粒藥丸, 每次食一半la, 係小朋友份量唻架.
醫生: 怕唔怕眼訓?
我: 好怕
醫生: 咁夜晚開重d藥丫
我: 唔得
醫生(開始想趕我走): 咁睡前粒藥重手d

藥...食晒勒
半粒藥既份量都食到我手震兼心跳, 莫非我同小朋友一樣...

 

因為彭浩翔, 因為任達華, 亦都因為邵美琪, 我對<出埃及記>既期望好高, 但經過上次<1408>既悲痛, 相信我, 其實我真係有將期望調低到. 多次睇戲既心得話俾我聽, 雷聲大既戲, 未必係雨點小, 但總會因過高期望, 當稍有差池, 即刻暴跌十倍, 太嚴苛都令佢變成極端失望
講番套戲, idea唔錯, 但係劇情既先後次序錯晒, 皇上話齣戲既拍法好實驗性, 何止拍法呀, 佢根本當d觀眾係實驗對象添la, 挑戰你既極限, 睇下你可以忍受到幾耐平鋪直敘無情緒起伏既劇情發展, 即使係o個part編輯K話所有男人都引頸以待既床戲, 我都唔覺有幾激bor. 如果, 所有演員既無表情同無感情都係導演特別安排既話, 我敢話, 呢套戲非常成功, 因為佢感染到觀眾都無表情添
皇上話死因在卓韻芝, 我相信溫碧霞都功不可沒, 不論係喊, 用粗口挑逗任達華同佢肉搏<--我相信o個part應該係挑逗卦, 唱歌, 搵老公, 甚至聲淚俱下咁表白, 都可以維持同一個表情同一個tone, 你真係要再三拍掌la
聖經既出埃及記係話神將以色列人從被當作奴隸既埃及解救出唻, 我估唔到成齣戲有邊個係擔演呢個角色, 我只係肯定, 睇完呢齣戲你唔會得到解救, 只會係迷妄加想鬧人, 好似戲入面既張家輝咁

 

o個位偷血飲既男子, 到底係唔係吸血疆屍呢?
一直都懷疑, 呢個世界真係有吸血疆屍,
唔係林正英o個種彈彈跳爛面疆屍喎, 係o個d好型仔好靚女既西洋疆屍, 我諗我係崇洋既
同朋友研究, 住o係香港既吸血疆屍應該靠炒股為生, 因為佢地朝頭早唔可以返工, 見光會變粉丫嘛, 而且佢地咁長命, 肯定神咁早o係匯豐幾蚊既時候已經大手買入, 到而家, 匯豐升左咁多, 佢地齋收息都賺唔少
住o係香港既吸血疆屍生活應該唔錯, 夜晚可以去蘭桂芳玩,
又或者上山頂睇夜景
早排政府建議用紙棺材,
佢地會唔會都響應買番個, 代替用開o個副黑猛猛棺材呢?
唔知佢地個雪櫃係咪好似血庫咁, 放滿唔同血型既血
但係佢地住邊呢?
你知啦, 吸血疆屍既好朋友係蝙蝠
如果佢地屋企成日有堆蝙蝠飛唻飛去, 會有人起疑架嘛
不過佢地d匯豐股賺咁多, 應該都係住大屋架勒
可能大到無人睇到間屋入面有蝙蝠
香港人成日養埋d另類寵物, 佢地都可以話: d蝙蝠係我養架
嘩, 型晒, 跟住就有班非吸血疆屍既普通人跟佢地一齊養蝙蝠勒

講到呢度, 朋友問我: 你係咪好悶呀? 點解可以無聊成咁

救命, 以為自己逃過一劫, 但開機先發現中左連環斬，俾zoe同臭jj點名....究竟呢個遊戲有無完結既一日?

Questions and Answers :
1.最近最開心ge事係咩事?

唔......唔駛再做咩咩咩law。

2.最近最難過ge事係咩事?

應該有既，但係到第2日就唔記得勒喎，話明最難過既事，做咩要迫人地諗番喎。

3.今年最大ge心願係咩？

成功講到一句無錯字無錯聲調無錯文法既普通話。

4.如果衣家有時間俾你去旅行,會去邊到? 

一定一定係西藏。

5.你最滿意自己身體邊個部分？見到人你會留意邊個部分？

無特別諗過喎，皮膚丫，因為唔會生暗瘡。。。 我會留意人地既手臂，睇下瘦得唻firm唔firm，可能變態過nail nail hunter梁joy。

6.有無試過失眠？你用咩方法對抗？

好少，通常掂到張床就會訓著。。。無架喎，好消極架，o係張床典唻典去law。

7.識唔識煮飯？要唔要你老公仔/老婆仔識得煮飯？　

我識煲飯，煮過下唔太好食又唔太難食又唔需要大家食完入急症室既菜，但已經係3年前既事，咁叫唔叫做識？。。。又唔駛既，識煮公仔麵得架勒。

8.你最想做邊個卡通片人物?why呀?

飄零燕入面既海迪，因為我好想食烤芝士同飲新鮮牛奶。

9.o係你心目中,我係點ge人?

zoe zoe--同月同日生既人

臭jj--好嘈好嘈，好想毒啞你

10.如果你可以令一件事restart,你會?

好多喎～～

1/　因為羨慕同學仔有得戴眼鏡，於是特登搭車睇書，趴o係度睇書，夜晚晚睇書，搞到自己有散光又近視，得償所願要戴眼鏡

2/ 大學揀科唔應該讀中文，應該讀nursing，可以識醫生

3/ 讀左中文應該去教書，荼毒下一代

4/ 細個唔識性唔應該死lur媽咪生個細妹陪我玩，等佢一生生左兩個．．．

11.你係咪自戀狂?

係人都有少少架la

12.2007年你最想實現ge係咩？

儲錢，可以認到人樣

13.你覺得我地下年仲會一齊嗎?意思係無論現實or心靈上？

呢個係咪示愛題唻架？！

14.要你諗,你會要一個你愛多ge,定係佢愛你多ge人?

愛就愛架la，點樣量度邊個付出多d呀，而且仲要計唻計去就唔係愛la。

15. “後悔”呢個詞語你會諗到？

發生左又改變唔到既野，所以唔好成日諗。

16.用個字或者一個詞語比喻＂愛情＂

旁若無人。

17. 青梅竹馬最好ge结局係咩?

做一世既朋友。

18.你同佢最甜蜜ge回憶係?

邊個佢呀？可唔可以問清楚d?

19.玩跳樓機驚d定係海盜船驚d？點解？

兩樣都唔驚。我唔驚離心力，只係驚鬼屋。

20.你會唔會成日收埋自己ge心事?點解?

又唔會成日既，一時時la，不過收埋左兩三日之後，又係會話俾人聽。因為o個刻唔想話俾人知law。

21.結左婚會唔會生BB?幾多個先?

生BB要幾百萬架喎，儲左錢先諗生定唔生同生幾多個la。

22.想幾歲結婚呢?

睇下幾歲有人向我求婚。

23.朋友既定義？

見過我最頹最低能最黑暗o個面，依然肯同我做朋友。

24.愛的定義是什麼?

隻眼開隻眼閉。

25.最近有冇同情人講大話?講左d咩?

無喎。

26. 你覺得今年年底恒指去唔去到2萬5, 點解?

我唔知呀，可唔可以用智慧錦囊，搵eva媽媽代答。

27.  你or妳會繼續玩這個game?感覺有趣or 無聊?

會既。除左有趣或者無聊之外，我可唔可以答：究竟d問題答完未呀。

28.  你覺得人生嘅意義係...

尋覓緊。

29. 最近一次impulse buying體驗係買左乜？

呢排買野好忍手喎。

30. 最近一次買大咗係幾時？

都話近排買野好忍手。

31. 你近期最喜歡看的電視節目是？點解？

animax播既愛麗斯學院同小丸子。因為鐘意睇卡通片。

32. 你覺得儲到幾多錢先可以退休去嘆呢？

如果去越南退休，應該幾十萬夠勒。

33. 每天花幾耐裝身?

要返工既話－－九個字至一個鐘不等。

唔駛返工－－五分鐘。

34. 近排睇左d咩書?(自設題目)

自己答埋先，張愛玲既張看。

 

eva，kimmy，frances，皇上同solo快d去答問題啦~~~~

 

遊戲規則:

一：比我點左名GE!要去我個BLOG報到,然後將所有問題COPY去自己個BLOG度,答好哂佢。

二：答哂問題後要自設多一條題目,另外要講返邊度得到呢D問題,再傳俾5個人,遊戲會繼續,不得返炒上一個。

遠方的友人o係我既blog留低一句"披住羊皮既狼",
久遺既評語,
佢唔講我都唔記得曾經有人咁話過我添
事隔多年先知道,
某人曾經好感激咁話: 好彩當日多得佢塊羊皮, 如果唔係實上演家變
多謝佢咁睇得起我喎
話俾朋友聽,
如果o個日我塊羊皮跌左落唻, 我第1個咬死既一定係某人
不過今日再發生, 我會記得提醒自己
tomorrow is another day
就算程車幾長途幾辛苦訓得幾唔自在都好,
訓醒覺,
就會見到無限風光

到底係晴天娃娃既關係, 定係o係心裡默念既求晴舞有用
抑或其他原因?
總之, 俾攝影師同化妝師加同事話我任性既死都要出outdoor影相既行為
果然無驚無險成功左
由起身一刻見到天黑黑, 到返到公司好似就落雨既勢
再出到觀塘發現左手邊陽光普照, 右邊風雨欲來
提心吊膽到影完相
好彩, 好彩真係無落雨
又好彩雷暴警告無成真

影左一個shot之後, 有secur嬸嬸走埋唻話唔俾影相
"我地係學生想做功課"再次成功過骨
同事問我呢個大話仲想用幾耐
我諗, 用到有一日對方工事工辦話唔得為止law
又或者去到有日, 我真係連dd咁多多既學生樣都無埋既時候
自己講話"我係學生"都唔好意思
我就會收手架勒

屋企部電腦終於除毒完畢, 重新投入工作, 連帶我既blog都復工
上個禮拜五, 返左去hall o, 其實7日前都返過去一次
忘記hall o期間會有幾嘈, 仲唔識死咁o係current樓過夜
即使hall既阿姐隻眼開隻眼閉, 唔駛錢放我上樓訓都補唔返
第2日成隻樂樂咁對住塊鏡,
不斷問自己點解要為左遲起身1個鐘, 而o係度捱左5個鐘既嘈音
訓左兩個鐘都無就要起身, 簡直係滿清十大酷刑之一

到禮拜五,
企o係高高既樓梯望住下面班freshmen dem cheer,
current既威勢可能有d, 但更多既係腳攰, 仲有人放左工著住條裙返去, 雙腳瞬即成為蚊仔既目標
freshmen一走, 成班人即刻不顧儀態坐o係地
對面馬路既人見到, 可能會覺得呢班人好無聊
但住hall既人又會認為呢樣野好重要
畢左業n年, 都要為個傳統返去浦浦頭
好難解釋每間大學既hall或者同一間大學既hall有d咩唔同
旁人甚至覺得過O 係件超harsh既行為
總之, 年年既hall o都會換唻大量既討伐, o係討論區一定有人圍攻
但過完o o個刻, 你會有種"無野做唔到"既諗法
幾cheer up~~

今日收到n個電話，
劈頭第一句係問：你對腳有無事？
吓！
點解大家都咁問我？
而大家聽到我話無事，
就呼一口氣，跟住就收線．
直至第4個電話，我先發現唔對路，
係咪我平時做得壞事多，大家驚我有報應，
又查到今日係我既凶日，所以打唻慰問
終於，某朋友話我今朝九點幾，
o係msn度廣發message，話自己broke my legs
引發一連串既恐怖事件
編輯K話應該係我部腦中左毒，
仲要係病毒源頭，
無得救

查實，我部腦中完毒無耐，
又整番好無幾耐jar wor．．．

同PR A講番我尋日遇上既"自言自語"怪談,
佢好驚咁話自己遲d會同佢有近距離接觸.

今朝訓醒,
我懷疑係因為七月,
總有d你唔想發生但又避唔過既怪異事情發生,
murmur murmur係其中之一,
睇到花師奶想用吸塵機柄打阿柑,
不自覺將卡通片同現實結合,
竟然覺得好心涼

農曆七月,
真係會發生奇怪事,
如果可以美夢成真,
你話幾好呢

近日無心情睇要用腦既書，抗拒研究每句說話轉左幾個彎先估到佢既意思既書，即係唔啱睇村上春樹或者邁克寫既野。心情奄悶轉睇哈利波特，由第一集睇到第六集，再由第一集既vcd睇至第四集，睇完仲係唔多夠。
想尋找名為＜寒蟬鳴泣之時＞既漫畫，

集懸疑，驚慄，兇殺同偵探於一身，感覺有d似金田一，但又唔會集集都為你解開謎團．．．．．．好想睇好想睇，但落到漫畫店，我竟然唔記得佢個名，同漫畫店嬸嬸講我想要＜樹下蟬咩咩＞，嬸嬸聽到一頭霧水，叫我轉睇＜感應少年＞。
刨到第12集，先醒起之前有線播過佢既改編電視劇．．．．．．又，愈睇愈發現：其實佢係要用腦架！！

8點15分, o岩o岩搭完架慢到死左既貨"lift"去還衫, 趕住離開公司
編輯K問我咁趕做咩, 我話要去踩單車, 跟住佢咁樣
補充說明: 要去加洲健身踩單車呀, 趕住上堂, 佢更加係
大家唔好睇小短短1個鐘既schwinn cycling,
跟住各位肌肉型教練既或中或英或現代或n年前"又見雪飄過"既音樂,
要踩o岩節奏, 仲要加重阻力
絕對會令你汗流不止
更加唔好提佢甚至要你坐o係度踩, 同企o係度怒踩既行為
踩左半個鐘, 你會開始質疑: 點解有梳化有爸爸閉翳你唔睇
要o係度自虐, 仲要o係一個充斥住汗味既地方自虐
無錯, 即使聞說間單車房有香味噴出, 但我咁耐而唻都聞唔到
而且只要你唔集中精神踩單車, 你就會聞到一股好強既汗臭味
所以, schwinn cycling除左係一個訓練你雙腳既有氧運動
仲係訓練你忍受力既另類活動添

尋日o個個鐘, 我就係不斷咁踩呀踩, 踩呀踩, 踩呀踩....
仲有擰側個頭偷睇爸爸閉翳, 跟住被發現同被眼神示意要專心