前晚, 同事C製造恐慌, 話星期四天文台會掛八號風球,
於是個個都好俾心機做野, 驚第2日要返工
結果係虛驚一場,
但你又點會估到, 颱風先生改變風向
o係人人都享受緊難得涼風送爽既日子, 突然唻個八號風球呢?
然後, 我經歷左個好似擠提既盛況
打電話同pr講cancel今日借衫既行程,
但電話線路jam晒
幾經艱辛搵到pr A, 佢話: 我都搵得你好辛苦呀
大有彷如隔世既感覺
跟住, pr B, C加booker D都有相同舉動
交待完正經事之後, 仲不忘同我講句: 好快D走勒
我錯覺以為大軍殺到, 唔走就無命陪
msn既msg閃唔停, 個個都問: 走未呀?走未呀?
究竟咩事呢?
雖然我都好驚朋友走唔切,
每隔10秒鐘就send個msg同佢講: 快d走勒
當我send到第12個msg時, 唔知佢真係走左定嫌我煩
佢好趕咁打著句: leave
就走左
o個一刻既感覺係世界末日
打風既節目係煲碟, 首先係Lindsay Lohan既高校小天后
睇完成隻碟, 我都唔知佢想點
下一隻想睇網上有緣人, 我仲有單身部落同英女皇
租碟時, 又係一場混戰
唔好以為只係得百x或x康先會有搶罐頭同公仔麵既情況發生
o係租碟店入面都一樣,
我見到有人一手攬住一橦dvd, 同行既小姐話: 你唔好咁癲la, 做咩租咁多喎
但係小姐又一邊講一邊將手上既dvd加上呢橦野上面,
情況有d似n年前o係pizza hut既salad bar咁,
總有一個人o係隔離制止你加高沙律, 話食唔晒好折墮, 但又同時將d青瓜同椰菜絲攝滿個碟邊
雖然, 佢地好落力咁加建呢幢dvd
但係臨門一腳, cashier哥哥好cool咁話: 每人限租6隻, 麻煩你去o個邊揀返你要既碟出唻, 唔該


究竟呢個風會打幾耐呢? 斷估都唔會係4日呀?!

故事係咁既....
俾皇上發現我鐘意甄先生後,
從此, 拳打腳踢機械人槍戰間諜黑社會殺破狼式電影都收歸我所有
而故事既發展又係咁既...
尋晚去左睇<叛諜追擊>, 有d似占士邦既戲
好彩有人九點鐘去左排隊, 如果唔係, 我驚重蹈睇<蜘蛛俠>既覆轍, 無得入
麥迪文擺明唔係sell瀟灑,
所就算套戲之前兩集好受歡迎, 我都唔係好高期望(指對佢個樣jar)
又估唔到佢拍動作場面都唔錯,
當然賣機智o個part更加攞滿分
今日同哈日同事講: 睇戲既時候, 有一刻, 我覺得麥迪文都幾型
換唻詫異眼神, 加多句質問: 唔係呀?!
突然有衝動摷番麥迪文拍過既戲唻睇添
死, 唔通我既口味又變左??

皇上, 我係咪可以睇<導火線>架??

家姐結婚, 一直覺得做綠葉既只要著條白色裙就ok, 一心諗住下個月先搞,
但太過懶懶行, 俾家姐同未來姐夫落最後通諜, 話尋日要搞掂佢
好好好, 我地呢d從善如流既一定會滿足你既要求
5分鐘搞掂左條裙, 仲俾兩夫婦話我太求其
其實我都有要求架, 唔要勁多珠片閃花lace層層疊tube dress拋胸粉紅色大大朵花過份飄逸長到拖地,
只係想要米白或米黃或淺色簡單直身無珠片
查實我唔係去跳舞, 條裙唔駛咁行
揀到勒, 但皇后同皇上又落聖旨, 話呢條裙係夜晚著既, 朝頭早要著另一條
然後, 條裙又要改短d, 又要搵多日出去試衫, 仲要買多條day dress<--新改既名
我問皇后: 可唔可以九月先買呀?
皇后眼厲厲: 你話呢!
民女惟有跟隨皇后既步伐
點解結婚要搞咁多野, 仲要結婚o個個唔係我噃

星期六, 日, 響足五日既電話係時候抖抖, 較左震機, 再有心地將佢留o係屋企
返唻check電話, 18個miss call, 一半係打唻追還衫
其實, 我都愛莫能助, d衫3日前我已經拎左去oa房,
到左禮拜六, 人人都放假或者返半晝既日子, 我應該搵邊個問d衫既下落呢?
索性唔負責任地唔聽電話

睇左<五星級大鼠>, 故仔幾得意, d野食好好味, 搞到我愈睇愈肚餓
只係個故仔長左d, 尾段太講道理, 可能要俾小朋友睇得明白, 於是畫公仔畫出腸, 有d悶悶地

就係睇完戲, 返左屋企, 發現有18個miss call
攤抖左一陣, 轉戰西貢食海鮮
大擦一餐返到屋企
睇到電話閃藍光, 今次係8個miss call

俾朋友話我係潛水艇
連電話都唔聽, 究竟個電話出唻做咩
所以我咪咁鐘意入戲院睇戲, 上堂同旅行囉,
因為可以名正言順熄電話, 換唻個零鐘, 甚至個幾禮拜既寧靜
用得手提電話多, 會致癌架

<暗戀桃花源>, 兩幕不同的劇卻有所連繫, 江濱柳夢迴魂牽雲之凡, 他的時間沒有移動, 一直停留在上海的最後一夜, 品茗時, 相親時, 或在病榻上, 都是那一晚. 等了又等, 等至行將就木, 等不及, 便登報尋人, 妻子跟他說話, 他就躺在40年前的那一夜, 終於盼到之凡來臨, 當日的熱情都消逝, 四目相投只剩無言, 暮然回首已是百年身
他的桃花源是40年前的回憶, 是兩個人的空間, 合該是最美的, 登報尋友, 便是離開桃花源, 結局卻非如願, 夢醒便不能再入夢.
<桃花源>是中學課本的一文, 舞台一片緋紅, 留守在此, 好歹也是快樂, 妄想要離開此地再重返, 只怕落入凡塵會沾一身污, 再難遁入此地, 那是呼應著<暗戀>
我看三地聯演版, 香港與大陸兩團合演, 名副其實兩團爭一台, 節奏流暢, 演員技巧也無可挑剔. 兩齣劇一悲一喜, 一雅一俗, 一今一古, 一國語一粵語, 兩相對比, 呼吸與情緒都隨兩劇轉接而改變. 只嫌<桃花源>太港式, 某些硬堆砌的對白與笑場, 本土化得過火
劇中穿插的紅衣女子, 我看不明白她在幹啥, 只覺畫蛇添足, 後來, 朋友解畫說女子要尋的人, 就是桃花源原著中的男子, 恍然大悟, 難怪至劇終她還是找不到
導演賴川聲說"<暗戀桃花源>是一面特殊的鏡子, 每一個人都可以從中看到不同的內容". 我看到的是我們人生的重覆與無盡的等待, 以不同的面貌重覆犯錯, 重覆日常, 然後沾沾自喜.

隔離位同事教我儲錢方法: 過三百蚊既野要諗清楚先買
於是佢制止我買八百蚊既ZUCCa牙仔表,
但係支持我買三百二十蚊既褲
同事M, 今朝起身, 我發現要拎大拿拿三百蚊買衫, 好肉痛
我係咪開始變樸素嘞?!
=============================
向皇上解釋變形金剛既吸引力, 優先場一定會有超多人去睇
我以為變形金剛係集體回憶
細個點都會睇過幾集佢既卡通片
應該有印象貨車變機械人呢幕
原來我同d同事唔係同一年代, 佢地竟然同我講細個睇小丸子...(唔好扮細喎, 同事們)
雖則我都唔係好記得d機械人名
屋企個柯柏文機械人都唔知去左邊添
不過, 齣戲拍得唔錯, 機械人同場景都好真
正如皇上所講, 我真係睇得好入神
睇編輯K口中既一堆扭打緊既廢鐵, 點都好過睇我曾經既偶像俾巴士撞再滾地然後跳上車頂繼續追賊
沒有打不死, 只有不可能
似乎太牽強
==============================
攝影師A建議去outdoor影相, 完全挑戰我今日既極限
從來唔識行石路, 之前去越南睇瀑布, 要o係石頭之間爬高爬低
同行兩位旅伴同司機叔叔極輕易咁行到老遠
我仲一步一驚心腳震震咁落山
今次著住條裙行石壩<==我唔識形容尋日既環境
A見到我雞手鴨腳咁, 話我係淑女既典範...多謝...
同陽光玩遊戲, 但無搽防曬
於是背脊多左個交叉印
化妝師同model安慰我, 人係要靠曬太陽先可以吸收維他命D
但我懷疑, 我身體既維他命D已經過剩, 唔駛再吸收

由細到大好鐘意將廣東話讀歪d音扮係國語,
其實都唔關鐘意事, 而係我少左條講普通話o既根
所以條脷永遠打晒結講唔清楚
亦都一直懷疑, 點解過往要訪問講普通話o既星時
我地可以溝通到, 仲完成到一篇訪問稿

普通話課已經完成左一半
朋友聽我講過幾句正宗國語之後, 評價係有進步
因為終於聽得明我講咩
我無講得咁差呀?!

不過, 我依然有好多字唔識讀
但好彩我唔係全班最差o既學生
話說今朝上堂, 老師問我地唔駛返工既時候會做咩
看書做瑜伽打籃球跳舞看電影通通入選
最絕都係有人講彈鋼琴
原汁原味將彈鋼琴3個字既廣東話讀歪一個音扮普通話, 即係"癱江芹"
臨落堂,
老師再問我地有無去睇熊貓, 知唔知新唻兩隻熊貓叫咩名
"樂樂"同"盈盈"此起彼落
再問之前兩隻叫咩名
全班靜默10秒, 然後有人答"安安"同"jiejie"
我見到老師塊面有3條黑線劃過
佢話: jiejie係姐姐咁解

皇上話我近排down down地, 所以醒左兩張謝先生既戲飛俾我
其實我係作感冒, 病病地先啱
食定幸福傷風素打底, 再加連續三日一日一粒康鈣C
但係感冒菌依然死纏
根據以往慣例, 每次病都係一發不可收拾
我只係希望病菌先生覺得無癮, 會自己走
======
因為唔舒服, 於是個腦既function有d問題
四日內做左無數低能事
禮拜一o係gi center出醜於cashier前
今日成為百老匯騎呢顧客頭十位
仲令到一眾好友獲得一個happy thursday
都係全靠我提供既笑料
直至呢刻, 我依然覺得我無可能會做上述既事
======
每次影outdoor, 都會變左苦力
揹住6套衫, 起碼4對鞋, 再加飾物pops
論論盡盡係我影sytling既寫照
今次為免再俾同事J話我虐待攝影師
特登搵定有冷氣既location
bonus係model帶埋老公唻
佢再幫我拎袋重到死既衫加鞋
由studio護送袋衫同佢老婆再行上三層樓梯
成件事即刻輕鬆晒
如果, 個model唔駛趕casting, location再大d, 時間再多d,
成件事應該會再好d


至於o個朵大過人頭既花
我決定用完再用無限次循環使用
先係噴白
跟住噴黑
再插o係頭
然後o係頸
仲有...
又可....

讀大學, 我有好多同學
1個faculty五百幾人, 剩係我修o個兩科都有百幾二百人, 每次上堂坐隔離既都係新面孔, 我又咁文靜, 雖然有咁多同學, 但都無乜可能識到同學仔
於是, 我識既人只係得hallmates同隔離hall既人

twins既相愛6年, 引發左無聊hallmates決心開party證明我地都係相愛6年既念頭
由奇怪idea出現到籌備到book場出invitation card, 仲認真到開會寫低會議記錄, 前後用左個半月
如果各位既上司見到大家工作效率咁高
應該都會加人工
而我只係懶懶行被知會同被威迫出席o個個
但係我都有提供d無聊遊戲俾搞手,
例如堅持當晚要玩trust ladder同運水, 但係被人鄙視兼反對
已經收到invitation card,
當晚dress code係黃色衫<--敝hall既hall color
唔算強人所難, 起碼班人未至於癲到要玩個cyber之夜或爆炸頭晚會(我之前一直擔心會成真)
但問題係, 黃色從來唔係我既favourite
搵勻全屋, 莫講話黃色衫, 連一件黃色既飾物同袋都無
朋友話著件hall tee去算
但係, 我留番o係度既hall tee都係得黑同藍色啫喎
呢個禮拜, 惟有set個目標係買黃色衫
如果唔係, 我驚禮拜六會俾人折磨死

塔地鐵人迫人, 無公德心既人漠視你已經扶住左枝扶手柱, 依然成個人黏落去, 濕淋淋既背脊責住你隻手
你驚會跌死??
o係條街行行下, 後面既小姐嬸嬸為左超前, 用隻手撥開你
點解只係得女人會咁做? 因為如果o個個係叔叔, 我會嗌非禮
朝早五點幾, 間房出面有隻白鴿咕咕咕咁叫我起身
仲要趕極都唔走
趕時間既時候搭扶手電梯, d人塞實o係度唔郁
右邊企左邊行, 你識唔識?
又係塔地鐵呀, 煙韌情侶互o即暗瘡
留番o係屋企做好唔好?
三十幾度高溫, 拎住一袋二袋借完衫既戰利品, 俾神秘嬸嬸或叔叔捉衫尾, 細細聲好似講秘密咁問你: 有無興趣做model?
無呀無呀, 扮model agency都搵個說服力高d la, 你見唔見我拎住好多野好重呀?!
睇哈利波特, 坐後面o既情侶跟住字幕讀英文,
我忍唔住擰轉頭同佢講: 先生, 我都識英文, 你唔駛讀俾我聽!
天氣炎熱, 所以呢排心火盛,
睇好多野都唔順眼
我會聽從朋友仔既建議, 飲杯廿四味

同事K預先告之睇<清明上河圖>既攻略
而朋友又一早買左12點既飛, 我地決定提早9個字去睇出面既展版
果然如同事K所講, 景物人物既表情都畫得好細緻同傳神
曾經有一刻想數下係咪有170棵樹, 同搵下畫中既"美女"
但當發現art center要分批放人去睇幅畫, 仲每次一放就十幾個人, 兼只得6分鐘由頭睇到尾, 我地就放棄左
同事K, 我無跟足你既方法, 所以我只係睇到幅畫既尾1/3 part
當有班人死賴o係幅畫既前頭, 6分鐘入面郁都唔郁, 仲用放大鏡同望遠鏡"欣賞"幅畫既時候,
我只可以聽從工作人員既指引由尾開始睇
10秒後, 工作人員話: 你地睇完就番去前面la, 唔好阻住後面既人
但o個班人仲塞左o係前面喎, 咁我地企o係佢地後面望住張寫住"清明上河圖"既簡介做咩呀?
再走走走, 走番去後面, 睇到正店同腳店仲有占卜攤檔加虹橋,
個擾人鬧鐘就響勒
吓...6分鐘勒?! 我究竟睇左d咩?
工作人員同時趕我地走
同事K, 我比你更不幸, 因為我大部分時間只係睇到班香港人既背脊
同行朋友問: art center所謂既人流管制, 係一次過放一大班人睇幅畫, 但人數遠遠超過個展櫃可容納既數目, 佢係咪計過條數, 想o係幾日入面, 俾700萬人睇晒?!
呢個係個謎, 要搵貽興黃同adam鄭解答
我只係想悠閒咁睇畫,
最後發現隔離既晉唐宋元書畫展, 先滿足到我既要求
又或者, 我應該買個放大鏡
慢慢睇番個迷你卷軸入面既畫

最近為食塔B見到至愛牛角飽同百力枝零食都唔食, 又無乜心機咁匿O係籠入面唔出唻玩, 好似心事重重咁
於是, 朋友幫我帶佢睇獸醫
證實塔B發燒, 要打兩枝針加食藥
朋友事後匯報, 等睇醫生期間,
塔B見到坐o係隔離既貴婦狗好乖咁趴o係主人既膊頭度
平時一d都唔黐身既塔B即刻有樣學樣, 由個袋都爬出唻, 再一路向上爬, 成功學狗仔咁趴O係朋友既膊頭上
早排, 朋友話想訓練塔B拎拖鞋, 同hand hand
令塔B既狗化有嚴重跡象
夠勒, 朋友, 其實我一早都放棄我養左隻兔仔既諗法
亦接受左兔仔會同狗一齊玩同好似狗仔咁由門口跟人跟到入屋
但唔好令佢愈唻愈似隻狗la
我已經唔記得兔仔應該係咩樣勒

從未試過睇concert坐第一排, 多謝Fossil pr送唻靚飛兩張俾每個記者
距離近到望到軒仔唱到青筋現, janice hyper地邊跳邊唱兼伸脷, Kary靚靚長腿加長氣靚聲, 仲有白褸黑褲既光良唱童話同不時伸手校咪
而且, 仲有得同光良握手, 嘩~~嘩~~容許我尖叫幾聲表達內心既興奮
我隻右手摸到光良隻右手喎, 同古天樂近距離做訪問都無咁興奮
同事C同M努力揮動扑扑棒吸引軒仔既注意, 可惜, 軒仔都係無同我地揮手, 亦都無落台既握手位, 而且佢既飛吻, 係俾左坐o係我地隔離既pr, oh no
超正既concert, 超正既歌星, 超正既歌, 超正既氣氛, 超正既一晚
不遑我地期待左咁耐
Good Show

同光良超近距離接觸, 好正


禮拜三睇<史力加3>, 散場時, 有史力加出唻送客同影相, 其實, 我鐘意嘔奶史力b多d

送你n個笑臉



這笑臉是被生炸的哈哈薯, 和舊同事N order時, 也忍不住會哈哈笑的哈哈薯, 1, 2, 3, 4, 5.....13個笑臉擠在碟子上



同場加映今晚在寵物店遇上的孤獨獅子兔

年中月中我會做好多無聊野, 忽然想學呢樣學o個樣, 但好多都係唔"鄧"駛既野, 最經典既係作為一個路癡, 我走左去學車, 仲要係棍波車.
當時覺得一樣俾咁多錢, 但個車牌寫明我full classes係1同2, 感覺會型d.
事後證明:
1) 其實我只係會開自動波車出街, 因為我屋企根本無棍波車
2) 我好日都唔會自己一個開車周圍去, 因為我既泊車技術仲係好渣
3) 朋友都唔敢坐我架車, 因為驚我會蕩失路
4) 未來10年我都唔會買車, 因為養架車仲貴過養塔b多多聲, 我寧願幫塔b搵個老婆
5) 溫室效應愈唻愈嚴重, 我驚遲d無左冬天, 都係減少汽車廢氣好d
6) 買左車之後開去邊好? 因為我既活動範圍係旺角尖沙咀銅鑼灣, 全部有小巴地鐵直達, 方便程度有10分
禮拜五去左Loewe既pre-fall collection presentation, 選址土瓜灣既mini cooper showroom.
當所有人都focus o係兩個model身上, 大叫"Lynn, 呢邊", "Ana, 影多張"時, 我眼見遠方插針都插唔入, 就走去同我既dream car相聚
反正影model呢樣野, 有攝影師負責
如果可以既話, 我想坐埋上架車度自拍一張

紅白相間既車, 好可愛, 你係咪為我而設架?

每次影styling既日子, 都係勞役阿聖既機會, 繼前個禮拜佢同同事J o係鬧市訓身演出後, 斷估唔到, 今次係扮學生借地方影相
烈日下暴曬, 仲要搬搬抬抬, 兼整污糟埋件衫, 事後, 俾同事J話我再次勞役佢個photog,
我都覺得有d唔好意思.
又難得著住長衫既model毫無怨言, 仲o係空檔時間擺hyper pose,
萬分感激


一行四人阻住叔叔們收工, 到最後, 叔叔停晒手唔做野, 企o係側邊睇我地影相, 仲圍住阿聖問佢呢樣o個樣, make up話好羨慕佢可以"俾佬圍", 好人叔叔甚至叫我地聽日再唻影過, 其實佢地究竟有無懷疑過我地做呢份係咩功課呢?
次次出outdoor影相, 我都懷疑自己變左做乞兒, 當然同攝影師相比, 我既爛身爛勢同污糟程度都只係初入行既乞兒
但我既"受黑"程度已經去到臨界點, 唔可以再黑架勒
唔通下次我要著長袖衫長褲同蒙面帽影相?

雖然話記者同pr既關係係互惠互利, 所以大部分pr都會配合我地既要求
但今日搵pr幫手, 而佢地都非常熱心地伸出援手時, 我依然覺得感動
仲廣發sms俾朋友們, 話俾佢地聽: 呢個世界係有好人架
係咪我太易受感動呢?
========
努力執屋,
搵到咸豐年既grad din相同F.5 o係學校扮花時既相(分別由5個人合演葉, 花, 莖同泥, 好認真)
仲有仲有, 剪左個超短男仔頭既男扮女裝相
近日朋友間既討論話題係: 花樣少男少女究竟係男女愛情片, 定男男之戀?
我仲不斷話Ella個男裝扮相維肖維妙
估唔到, 原來當年既自己都不遑多讓
甚至試過係女廁俾個嬸嬸叫我做哥哥
唉...往事不堪回首

朝早七點起身同平時會有咩唔同?
答案係會出現骨牌效應: 1點對住學生想訓覺, 四點o係梳化睇睇下電視訓著左, 10點o係家姐屋企覺得好眼訓, 10點半拒絕朋友竹戰既邀請, 因為我要訓, 11點返到自己屋企真係訓著左, 連帶今朝6點幾鬼打咁精神想起身, 但死lu爛lu 8點半先離開張床.
得出結論: 我可以早睡早起扮OL
==========================
妺妹話: 唔係fa, "你好"同"你早"都要學? 你唔識既咩?
我: 係呀, 我唔識
期間, 我仲懶醒咁問妹妹: 你知唔知"問"同"吻"點講丫, 哼!
之後, 我仲好學不倦咁拎本書出唻溫, oh, 我突然覺得自己好勤力, 係好學生
==========================
讀大學時, 我都做過同樣既事, 仲捉住matemate(room-mate)要佢教我發音, 後來, 佢好仁慈咁同我講: 不如你學第二樣呢?<--連唔識說話藝術既matemate都咁識講野, 應該係因為得到我兩年唻既潛移默化
我學過第二樣架, 不過, 而家又返番轉頭啫
第一堂課既得著係, 我識得講"問"同"吻", 好叻
======================
今朝起身, 靈光一閃, 如果我借唔切衫
不如o係影樓拎塊布
即席o係佢身上披披搭搭加個扣針, 扮o係coture衫丫
前提係大家忍受到我用3個鐘去披搭1件衫
不過, 我會用今明兩日訓練, 等我o係10分鐘內完成到件衫架
JJ, 如果我苦練成功, 到我幫你手又點話丫
======================
阿Q鍾意用自己既方法諗野, 旁人覺得佢愚笨得可怕(甚至可笑)
不過, 用另一個角度睇同一件, 氹下自己開心
好過愁眉苦臉過父親節
甚至唉聲嘆氣到當日gra

繼上次大雨滂沱, 無奈放皇上飛機, 今日因為心情突然低落, 再放多次
sorry呀
皇上唔好因為咁以後唔約我去街, 亦都唔好要我永遠做民女呀
多謝同事致電慰問
我無事既...應該
==============================
開始為期三個月既周六早起之約
自從中五之後(同某幾日旅行), 我都無乜幾可朝早七點起身
但係近日不斷破例
先係尋日九點半影model, 為左有足夠時間o係屋企食早餐睇報紙同回魂, 我都係七點起身既
再唻挑戰極限既三個月計劃
朋友們對我既計劃持半支持態度, 大家都認為我無乜可能捱到三個月
為左今日可以準時出席, 我已經廣發通知:
以後逢禮拜五唔好搵我出街, 同埋我11點要返到屋企, 因為12點一定要訓覺
希望, 三個月快d過
事關我今日爭d o係學生面前瞌眼訓

尋晚, 妹妹出席grad. din., 個半月前佢已經同我講要買新衫新鞋, 當然, 錢同買衫既任務都係由做家姐既負責
Grad. din.果然魅力非凡, 令平時只係牛記笠記既妹妹都咁緊張, 話說佢有個著裙規條, 一年只會著一次裙(撇除校服裙), 新年祖母生日婆婆生日媽媽節爸爸節各大節日, 任擇其一, quota只有一個, 今年你揀左要佢新年著裙, 咁到年尾都咪駛指意見到佢會著條飄飄裙出唻
Grad. din.竟然令佢打破規條, 配服
命苦既家姐o係前一晚幫佢搵晒衫鞋首飾, 仲要教埋佢化妝(天呀!!), 媽咪問我: 你唔係幫佢化埋妝先返工既咩?
我答: 係呀, 我請假既原因係"幫妹妹準備謝師宴", 你估人事部會有咩反應呢?
話說當年我既盛裝係整左個不堪回首既髮型, 仲要特登去salon set頭, 結果係我簡直想燒左當晚既相. 點解髮型師可以整得出呢個頭, 又點解, 當日我會收貨, 甚至覺得自己好靚既?
經驗之談, 同妹妹講, 你都係唔好搞咁多野勒, 我唔想你做畫蛇添足既主角
6點幾, 妹妹打電話唻匯報grad din盛況, 大量小妹妹著左去婚紗鋪租既晚裝
吓!!!好想睇好想睇, 即刻叫佢偷影俾我睇下
今朝起身睇左相, o個種盛況令我諗起奧斯卡, 試問有幾多人有幾多機會可以著件拖尾晚裝, 或者係成件綴滿立體花花, 好似YSL咁既衫, 甚至係成件都係紅色lace既裙呢?
我欣賞小妹妹既創意同勇氣, 事關, 真係無乜人敢著住上述既衫搭地鐵