真身曝光！伊面超人的前世今生

以上是由伊面主演的新版泰國咸蛋超《Project Ultraman》的預告，唔知個故事講咩，但順便和大家回顧一下n年前的泰國超人。

話說當年日本咸蛋超人如日中天，泰國曾同日本合作過拍超人(Ultraman)電影《หนุมาน พบ 7 ยอดมนุษย์》(英文是：Hanuman and the 7 Ultraman，日文是：ウルトラ6兄弟VS怪獣軍団 )，片中一眾超人家族成員，如吉田、七星俠等，甚至連超人之母都有現身，但通通不是主角，主角是一個樣似搞笑怪獸多過似救世超人的泰國版咸超。故事大約講有個細路死左，一如《超人》系列，當然又玩超人附身，從此個細路就變成泰國超人。由於本片仍泰日合作，雙方都說自己擁有超人的版權(見註)，我地當然知日本先係正宗，但今時今日泰國係法理上又真係有權自己拍套新超人，作為超人fans，都想知新版會點，因舊版根本是笑片。

本想放段片給大家看，可惜YOUTUBE上的相關影片已被delete，大家睇住相先，有片再給大家看，亦歡迎大家提供：

舊版泰國超人

你一定會覺得奇怪，點解舊版泰國超人咁似一隻馬嬲？其實不用奇怪，因為牠……sorry係「他」真係一隻馬嬲，他是以泰國神話中的猴神(Hanuman)的原型作設定的，所以個細路變身時，根本就似請「師傅上身」多過變身，最抵死係個細路的變身動作真係要跳返part泰國舞，打怪獸途中，亦不忘邊跳舞邊打。片中泰國超人連同一班超人兄弟拿齊「架撐」圍摳手無串鐵的怪獸，被網民譏知吉田等個個變晒黑社會，如果O係香港拍可能佢地會著G.O.D。

我之所以咁清楚，皆因曾在《新假期》的別冊《playground》寫過一篇相關的稿，當時剛剛爆出一個驚世娛樂新聞：鄭伊健接拍新版本的《泰國超人》。當時的稿件大約寫：「伊面以為揚威國際，點知可能要做小丑！」幸好新版的超人樣子和變身方式總算「正常」，特技仲要好似唔錯，所以，伊面超人，我等你。(假如香港有得睇的話)

P.S，按超人兄弟的慣例，除了「獅子星」(Ultraman Leo )之類的「異族」超人外，所有超人全都出自M-78星雲的超人家族，每個超人除了有一個作為附身的地球人身份外，自己同時都有真身的，真身全是超人之母同超人之父所生、出生地為M-78星雲。獅子星超人來自獅子星雲，又無同超人之母接觸過，當然唔關超人家族事，但舊版泰國超人明明講係超人之母救左個泰國細路，親手令佢變成泰國超人，咁泰國超人的真身即係邊個？來自邊度？既然係由超人之母親手將佢變做超人，而超人之父又無出場，唔通係私生子……難得一班超人兄弟都會幫佢手打怪獸！

超人之母：乖~~過來鍚返！

泰國超人：我cute唔cute先？

註： 「轉載知日部屋家」：超人來自泰國白猿王？原來日本圓谷公司在1966年創造超人時，其造型及意念是來自泰國民間傳說白猴王(Hamu)，Hamu則是演變自印度神話裡的猴神（有人指出中國的孫悟空是印度猴神的中國版）。泰國Chaiyo公司創立人Saengduenchai堅稱他是將Hamu介紹給円谷的創立人。1974年圓谷與Chaiyo共同製作鹹蛋超人電影，版權誰屬並沒有清楚釐清。Chaiyo宣稱泰方借錢給圓谷以換來版權，後來圓谷在日本不斷拍鹹蛋超人作品，Chaiyo並沒有提出異議。1995年Chaiyo向円谷表示擁有超人的國際版權。圓谷表示Chaiyo只擁有泰國的超人版權，結果雙方鬧上法庭。2001年泰國法廷及2005年日本高級法院判Chaiyo獲勝。Chaiyo便能名正言順開拍泰國版的超人電視系列及電影，而且設計新的造型及生產有關商品，又已開始在泰國建立鹹蛋超人主題公園(2009完成)。